Tags-Khwab

sāmne aate nahīñ aur ḳhvāb meñ
muñh chhupā lete haiñ duzdān-e-azīz

jis kā chehra gulāb jaisā hai
us kā milnā to ḳhvāb jaisā hai

zindagī TuuTe hue ḳhvāboñ meñ guzrī hai to kyaa!
aaj bhī ik ḳhvāb āñkhoñ meñ liye baiThā huuñ maiñ

haiñ ye riñd-o-sāqī hisāb meñ
kabhī sochā bhī na thā ḳhvāb meñ

lashkar-e-ḳhvāb kisī taur utar āñkhoñ meñ
raat bhar niiñd kā rasta nahīñ dekhā jaatā

jo roz o shab ke nasīb meñ be-darī hai likhnī
na ḳhvāb denā na dil meñ shauq visāl denā

vahāñ se ḳhvāb koī aur le uḌā ho use
mirī nigāh tirī aañkh meñ rukī hī na ho

khulī thī aañkh samundar kī mauj-e-ḳhvāb thā vo
kahīñ pata na thā us kā ki naqsh-e-āb thā vo

zamīn-e-chashm meñ bo.e the maiñ ne ḳhvāb ke biij
magar uge to khulā vo the iztirāb ke biij

vo sāmne hai magar us ko chhū nahīñ saktā
maiñ pūjtā huuñ vo paikar jo ḳhvāb jaisā hai

dekhā thā raat ḳhvāb meñ sahrā-mizāj shaḳhs
nagrī bhī lag rahī thī vo ḳhvāja farīd kī

jā rahe ho to mire ḳhvāb bhī lete jaao
dil ujāḌā hai to āñkhoñ ko bhī sahrā kar do

tum to ai mehrbān anūThe nikle
jab aan ke paas baiThe rūThe nikle

ham ne to apnī aañkh se dekhā nahīñ unheñ
qissa sunā hai hazrat-e-'shañkar' ke ḳhvāb kā

had se baḌhtī huī ta.azīr meñ dekhā jaa.e
ḳhvāb ko ḳhvāb kī ta.abīr meñ dekhā jaa.e

koī afsāna samjhe yā bayān-e-vāqi.a samjhe
mujhe ik ḳhvāb-e-nādīda kī ta.abīreñ nazar aa.iiñ

kahāñ se DhūñDh ke lā.ūñ purāne ḳhvāb āñkhoñ meñ
koī manzar nahīñ tikTā mirī sairāb āñkhoñ meñ

na nīndeñ thiiñ na aañsū the na ḳhushiyāñ thiiñ magar tū thā
ki ab tū bhī nahīñ aatā hai in be-ḳhvāb āñkhoñ meñ

jise ta.amīr kā Dar hai chalā jaa.e vo bin bole
jo haiñ tayyār sach ko vo raheñge ḳhvāb āñkhoñ meñ

yahāñ to jāgtī āñkhoñ meñ ḳhvāb jāgte haiñ
jo jāgte hoñ unheñ ḳhvāb se jagā.e kaun