Tags-Khwab

ġhairoñ ne kuchh ḳhvāb dikhā kar niiñd churā lī āñkhoñ se
lorī de de haar ga.ī jo ghar āñgan kī miTTī hai

maiñ ek ret kā paikar thā aur bikhar bhī gayā
ajab thā ḳhvāb ki maiñ ḳhvāb hī meñ Dar bhī gayā

uThe ham jo ḳhvāb-o-ḳhayāl hai lage takne dīda-e-hāl se
ki vo kab uThe vo kidhar ga.e abhī paas the abhī kyā hue

nūr-e-ḳhurshīd ko ilzām na do
sub.h kā ḳhvāb-e-girāñ haiñ ham log

likhte dekhā thā ḳhvāb meñ un ko
ab talak nāma-bar nahīñ aayā

tā-qayāmat dil-e-bedār sunā.e har roz
ḳhvāb-e-rāhat tirā gar roz kahānī māñge

shab bhar to tirī yaad kā mela sā lagā thā
is bhiiḌ meñ kuchh ḳhvāb-e-sahar lauT ga.e haiñ

us ke lahje kī zad meñ aate hī
kāñch ke ḳhvāb TuuT jaate the

dīvār se lag kar sochoñ kī ummīd kā saarā din guzrā
jab raat huī to ham ko bhī sab ḳhvāb hamāre yaad aa.e

aane vaale hādsoñ ke ḳhauf se sahme hue
log phirte haiñ ki jaise ḳhvāb hoñ TuuTe hue

ḳhvāb ke rath jis jagah hotā hai bādal par safar
aaj shab le jā mujhe tū un jahānoñ meñ kahīñ

hamārī jāgtī āñkhoñ meñ ḳhvāb sā kyā thā
ghanerī shab meñ ugā āftāb sā kyā thā

dil churāte haiñ sabhī din ke ujāle meñ magar
koī rātoñ ko mirā ḳhvāb churā.e haa.e

har fard aaj TūTte lamhoñ ke shor meñ
asr-e-ravāñ kī jāgtī ā.ankhoñ kā ḳhvāb hai

palkoñ pe aaj niiñd kī kircheñ bikhar ga.iiñ
shīshe kī aañkh meñ koī patthar kā ḳhvāb hai

koī dālān se jugnū na idhar aa nikle
ḳhvāb ho jaa.eñ na bedār use dekh ke dekh

kyuuñ na duuñ maiñ dūsroñ ko ratjage kā mashvara
maiñ ki ḳhud nādim huuñ apne ḳhvāb kī ta.abīr par

ab maiñ huuñ aur ḳhvāb-e-pareshāñ hai mere saath
kitnā paḌegā aur abhī jāgnā mujhe

mauj-dar-mauj samundar se mulāqāt huī
ḳhvāb ko ḳhvāb sar-e-sat.h-e-zamīñ likhā gayā

chāñd ko tālāb mujh ko ḳhvāb vāpas kar diyā
din-Dhale sūraj ne sab asbāb vāpas kar diyā