Tags-Khwab

jannat ke ḳhvāb dekh ke aatī haiñ ham ko yaad
rindāna sohbateñ vo kabāb-o-shabāb kī

peḌ the saa.e the pagDanDī thī ik jaatī huī
kyā ye sab kuchh ḳhvāb thā sach-much yahāñ aisā na thā

koī gosha ḳhvāb kā sā DhūñD hī lete the ham
shahr apnā shahr 'bānī' be-amāñ aisā na thā

bulā rahī haiñ hameñ talḳhiyāñ haqīqat kī
ḳhayāl-o-ḳhvāb kī duniyā se ab nikalte haiñ

zarā sī aas bhī ta.abīr kī nahīñ jin ko
diloñ meñ ḳhvāb vo kyā soch kar machalte haiñ

āhaToñ ke sarāb meñ gum haiñ
terī bāhoñ ke ḳhvāb meñ gum haiñ

ḳhvāb-dar-ḳhvāb thā jo shīrāza
ab kahāñ hai bikhar gayā kab kā

mirī raakh meñ thiiñ kahīñ kahīñ mere ek ḳhvāb kī kirchiyāñ
mere jism-o-jāñ meñ chhupā huā tirī qurbatoñ kā ḳhayāl thā

vo chāhe ḳhvāb ho ki haqīqat magar kabhī
ehsāñ uThā.egā na libās-e-majāz kā

jal thal kā ḳhvāb thā ki kināre Dubo gayā
tanhā kañval bhī jhiil se bāhar nikal paḌā

ḳhvāb meñ bhī nazar nahīñ aayā
raat jis ne mujhe jagāyā hai

vafā kā ḳhvāb hai 'ehsān' ḳhvāb-e-be-tābīr
vafā.eñ kar ke muqaddar ko āzmā.e jā

samā.atoñ meñ bahut duur kī sadā le kar
bhaTak rahā huuñ maiñ ik ḳhvāb kā patā le kar

tumhārā ḳhvāb bhī aa.e to niiñd puurī ho
maiñ so to jā.ūñgā niiñd aane kī davā le kar

aisā na ho ki nashshe meñ kaT jaa.e zindagī
āñkhoñ ko koī ḳhvāb na do maiñ nashe meñ huuñ

takiya-e-maḳhmalī sirhāne rakh
lekin āñkhoñ siiñ apnī ḳhvāb nikāl

aks añgḌā.ī le bhī saktā hai
aa.ina mahv-e-ḳhvāb hotā hai

jo āñkheñ ḳhvāb banñe ke liye thiiñ
vo ab aañsū bahāne ke liye haiñ

vo aayā 'akbar' is adā se aaj mere sāmne
ki ik jhalak sī ḳhvāb kī dikhā dikhā ke chal diyā

un se bāteñ kar rahā huuñ vo khaḌe haiñ sāmne
jāgtā rahtā huuñ lekin dekhtā rahtā huuñ ḳhvāb