Tags-Khwab

ḳhvāb-e-derīna kā manzar bhī ajab manzar hai
ham tirī god meñ jāgeñ bhī to so.e jaa.eñ

jab kabhī ḳhvāb kī ummīd bañdhā kartī hai
niiñd āñkhoñ meñ pareshān phirā kartī hai

bazm-e-jāñ se chupke chupke ḳhvāb sab ruḳhsat hue
ham bhalā karte bhī kyā bas gintiyāñ ginte rahe

zamān-e-hijr sahī phir bhī ai junūn-e-ummīd
dimāġh meñ yahī rañgīn ḳhvāb rahne de

'āzim' pyaar kī nagrī se kuchh ḳhvāb churā kar le aao
us nagrī meñ sunte haiñ kuchh rāñjhe haiñ kuchh hīreñ haiñ

jo bhī narmī hai ḳhayāloñ meñ na hone se hai
ḳhvāb āñkhoñ se nikal jaa.eñ to patthar ho jaa.eñ

jalva dikhā de ḳhvāb meñ bahr-e-ḳhudā mujhe
āñkheñ taras ga.iiñ tire dīdār ke liye

ye ḳhayāl thā kabhī ḳhvāb meñ tujhe dekhte
kabhī zindagī kī kitāb meñ tujhe dekhte

tamkīñ hai aur husn-e-garebāñ hai aur ham
ḳhuddāriyoñ kā ḳhvāb-e-pareshāñ hai aur ham

us ḳhvāb kī ta.abīr mujhe miltī bhī kaise
vo ḳhvāb to afsānoñ meñ Dhalne ke liye thā

vo bhī apne husn se be-ḳhayāl ho chalā
aur ḳhvāb ban ga.iiñ merī sar-girāniyāñ

ḳhvāb āñkhoñ meñ so ga.e lekin
raat bhar jāgtī rahī āñkheñ

ik lamhe kī haqīqat tak jaane ke liye
ḳhvāb ka.ī sadiyoñ tak chaltā rahtā hai

aise Dare haiñ kis kī nigāh-e-ġhazab se ham
bad-ḳhvāb ho ga.e haiñ jo do chaar shab se ham

na koī rok sakā ḳhvāb ke safīroñ ko
udaas kar ga.e nīndoñ ke rāhgīroñ ko

bajā rahā thā kahīñ duur koī shahnā.ī
uThā huuñ āñkhoñ meñ ik ḳhvāb-e-nā-tamām liye

shikasta ḳhvāb mire ā.īne meñ rakkhe haiñ
ye kyā azaab mire aa.ine meñ rakkhe haiñ

mire saare ḳhvāb haiñ mo'tabar maiñ huuñ dar-ba-dar
ye uruuj hai ki zavāl hai ye savāl hai

tilism-e-ḳhvāb se āñkheñ agar āzād ho jaa.eñ
to zinda rahne kā saarā maza tabdīl ho jaa.e

aao ki aaj ġhaur kareñ is savāl par
dekhe the ham ne jo vo hasīñ ḳhvāb kyā hue