Tags-Khwab

ajab bojh palkoñ pe din bhar rahā hai
agarche tire ḳhvāb the halke halke

sarāsar silsila patthar kā chashm-e-nam ke ghar meñ hai
koī ab ḳhvāb dekhe bhī to kyuuñ ta.abīr ho paidā

raat meñ soyā thā dariyā ke qarīb
ḳhvāb meñ ik jal-parī mahsūs kī

maiñ ḳhvāb dekh rahā huuñ is ehtiyāt ke saath
itāb-e-sub.h se sapnā lahū-luhān na ho

dekhte kuchh haiñ dikhāte hameñ kuchh haiñ ki yahāñ
koī rishta hī nahīñ ḳhvāb kā tābīr ke saath

dikhā.ī de to vo bas ḳhvāb meñ dikhā.ī de
mirā ye haal ki maiñ muddatoñ se huuñ bedār

bārhā ḳhvāb meñ pā kar mujhe pyāsā 'mohsin'
us kī zulfoñ ne kiyā raqs ghaTāoñ jaisā

vafā ke va.ade hue zindagī ke ḳhvāb hue
tumhāre ahd-e-karam meñ sabhī ḳharāb hue

badal ga.iiñ vo fazā.eñ tire badalte hī
mahakte ḳhvāb sulagte hue sarāb hue

ab ḳhvāb meñ bhī us zālim ko bas hijr kā saudā rahtā hai
ai jazba-e-dil tū kis ke liye ye phuul aur paat banā.e hai

koī shahr-e-ḳhvāb guzar rahā hai ḳhayāl se
koī dasht-e-shām sulag rahā hai nigāh meñ

us ek ḳhvāb kī hasrat meñ jal bujhīñ āñkheñ
vo ek ḳhvāb ki ab tak nazar nahīñ aayā

milne kā va.ada un ke to muñh se nikal gayā
pūchhī jagah jo maiñ ne kahā hañs ke ḳhvāb meñ

dil kabhī ḳhvāb ke pīchhe kabhī duniyā kī taraf
ek ne ajr diyā ek ne ujrat nahīñ dī

bedād-garoñ kī Thokar se sab ḳhvāb suhāne chuur hue
ab dil kā sahārā ġham hī to hai ab ġham kā sahārā dil hī to hai

zamīn jaag rahī hai ki inqalāb hai kal
vo raat hai koī zarra bhī mahv-e-ḳhvāb nahīñ

muttasil tiflī se āġhāz-e-shabāb
ḳhvāb ke āġhosh meñ bedāriyāñ

ye mirī niiñd kis maqām pe hai
ḳhvāb meñ ḳhvāb dikh rahā hai mujhe

patthar na banā de mujhe mausam kī ye saḳhtī
mar jaa.eñ mire ḳhvāb na ta.abīr ke Dar se

jab se tujh ko dekhā hai
ḳhvāb ke vasīle se