Tags-Khwab

ab tak ik sham-e-siyah-posh huuñ sahrā sahrā
tujh se chhuT kar na milī rahguzar-e-ḳhvāb mujhe

shaam pūchhe to na kahnā ki maiñ duniyā meñ nahīñ
le ke phir aa.egā is ghar meñ mirā ḳhvāb mujhe

aag jañgal bharī nīñdoñ meñ lagāne vaale
tum bhī aanā na mire ḳhvāb-e-pareshāñ ke qarīb

ḳhushk āñkhoñ meñ tire ḳhvāb basā.ūñ kaise
koī chashma bhī zarūrī hai bayābāñ ke qarīb

dekh na is tarah guzār arsa-e-chashm se mujhe
fursat-e-dīd ho na ho mohlat-e-ḳhvāb de mujhe

bas-ki guzishtanī hai vaqt bas-ki shikastanī hai dil
ḳhvāb koī dikhā ki jo yaad na aa sake mujhe

in kī furqat meñ na pūchho sarguzisht-e-ḳhvāb-e-chashm
āj-kal pā-e-nigah kī Thokareñ khātī hai niiñd

furqat-e-dildār meñ sone ko marnā kahte haiñ
āshiqoñ meñ ḳhvāb-e-marg aise hī kahlātī hai niiñd

niiñd ko bhī niiñd aa jaatī hai hijr-e-yār meñ
chhoḌ kar be-ḳhvāb mujh ko aap so jaatī hai niiñd

ta.abīr kī rutoñ ne badan zard kar diye
phir bhī ye log ḳhvāb se bedār kab hue

us kī sohbat bhī hai ik ḳhvāb-sarā meñ rahnā
vo jo chal degā to ye ḳhvāb bikhar jā.egā

ḳhvāb nahīñ hai sannāTā hai lekin hai ta.abīr bahut
sachchī bāteñ kam kam haiñ aur jhuuT kī hai tash.hīr bahut

saarī shakleñ dhundlī dhundlī mub.ham sā hai manzar bhī
ḳhvāb kī kachchī buniyādoñ par karnī hai ta.amīr bahut

ḳhvāb āñkhoñ se judā ho na sake
ḳhvāb āñkhoñ se judā karte rahe

kyā aa.ī thiiñ hūreñ tire ghar raat ko mehmāñ
kal ḳhvāb meñ ujḌā huā firdaus-e-barīñ thā

shaboñ ke sabz jazīre haiñ sab mirī aqlīm
tamām jāgtī āñkhoñ ke ḳhvāb mere haiñ

mire hoñTh jaane kahāñ ga.e ki tire hī naam na le sake
mujhe harf o saut ke māvarā koī aur ḳhvāb-o-ḳhayāl de

tumheñ ḳhabar thī haqīqateñ talḳh haiñ jabhī to!
tumhārī āñkhoñ ne ḳhvāb ko mo'atabar kiyā hai

na.e daur ke na.e ḳhvāb haiñ na.e mausamoñ ke gulāb haiñ
ye mohabbatoñ ke charāġh haiñ inheñ nafratoñ kī havā na de

hasīn ḳhvāb hoñ kitne hī par koī 'ālok'
tamām umr kahāñ mahv-e-ḳhvāb rahtā hai