Tags-Khwab

bas itnā yaad hai soyā thā ik ummīd sī le kar
lahū se bhar ga.iiñ āñkheñ na jaane ḳhvāb kaisā thā

kaash is ḳhvāb kī ta.abīr kī mohlat na mile
sho.ale ugte nazar aa.e mujhe gulzār ke beach

shahr-e-dil ke ḳhvāb kī kyā ta.abīr karūñ
kabhī nayā ye kabhī purānā lagtā hai

terī hī tarah aatā hai āñkhoñ meñ tirā ḳhvāb
sachchā nahīñ hotā kabhī jhūTā nahīñ hotā

vo kaisā tire jism kā ḳhvāb thā
ki jis ke lahū meñ sharāre uchhalte rahe

kitāb-e-shauq meñ in band baab āñkhoñ ko
na sahl jaan mirī jaan ḳhvāb āñkhoñ ko

ye fāsloñ kī haqīqat ye qurbatoñ kā tilism
azaab haiñ ye ta.alluq ke ḳhvāb āñkhoñ ko

jis kī nazar meñ vus.at-e-ḳhvāb-o-ḳhayāl thī
us kā vajūd markaz-e-ahl-e-nazar huā

us husn se kuchh hastī meñ tirī azdād hue the aa ke baham
ik ḳhvāb-o-haqīqat kā sañgam miTTī pe qadam nazroñ meñ iram

kuchh hamāre bhī sitāre tire dāman pe raheñ
ham bhī kuchh ḳhvāb jahān-e-guzrāñ rakhte haiñ

ḳhvāb ya.anī ye shab-o-roz jise chāhiye hoñ
aa ke le jaa.e ab āvāz lagātā phire kaun

is se pahle kahāñ the ham kis ḳhvāb meñ the
ham donoñ ko ek safar pe ravāñ honā thā

baḌī aarzū thī ham ko na.e ḳhvāb dekhne kī
so ab apnī zindagī meñ na.e ḳhvāb bhar rahe haiñ

har ḳhvāb ke makāñ ko mismār kar diyā hai
behtar dinoñ kā aanā dushvār kar diyā hai

ai mire dil batā ḳhvāb buntā hai kyuuñ
rūThnā un kī fitrat hai rotā hai kyuuñ

taqdīr ke darbār meñ alqāb paḌe the
ham log magar ḳhvāb meñ be-ḳhvāb paḌe the

kal raat meñ jis raah se ghar lauT ke aayā
us raah meñ bikhre hue kuchh ḳhvāb paḌe the

kis ḳhatā par ye uThānā paḌī rātoñ kī salīb
ham ne dekhā thā abhī ḳhvāb-e-sahar hī kitnā

bazm se uThne se pahle ye zarā soch bhī le
ḳhvāb ban jā.egā nazroñ se guzarne vaalā

muddatoñ ghaav kiye jis ke badan par ham ne
vaqt aayā to usī ḳhvāb ko talvār kiyā