Tags-Lab

larzish-e-lab meñ sharāb-o-sher kā tūfān hai
jumbish-e-mizhgāñ meñ afsūn-e-ġhazal-ḳhvānī hai aaj

phir mire lab par qasīde haiñ lab-o-ruḳhsār ke
phir kisī chehre pe tābānī sī tābānī hai aaj

rāz-e-dil haiñ pūchhte aur bolne dete nahīñ
baat muñh par aa rahī hai lab hilānā hai manā

muḳhtārī ke lab silvānā jabr ajab-tar Thahrā hai
haijān-e-ġhairat barpā hai allāh-hū ke baaḌe meñ

kamī kamī sī thī kuchh rañg-o-bū-e-gulshan meñ
lab-e-bahār se niklī huī duā tum ho

aisī mahfil meñ shirkat se kyā fā.eda aise logoñ se koī tavaqqo.a bhī kyā
jo kahā jaa.e ḳhāmosh sunte raho lab-kushā.ī kī qat.an ijāzat nahīñ

jab se aayā huuñ yahāñ mohr-ba-lab baiThā huuñ
mujh ko mahfil meñ bulāne kī zarūrat kyā thī

jis tarah rañg-e-shafaq jhiil meñ ghul jaatā hai
aks-e-lab aise utartā hai tah-e-jām tirā

tabassum zer-e-lab bhī ishq ko mauj-e-tasallī hai
samundar so gayā dāman meñ ḳhālī sīpiyāñ bhar kar

misāl-e-mushk zabāñ se mirī fasāna gayā
maiñ ik tarannum-e-ḳhush-lab jise sunā na gayā

bikhrī ik baar to haath aa.ī hai kab mauj-e-shamīm
dil se niklī hai to kab lab pe fuġhāñ Thahrī hai

aaj 'rabāb' ke lab par chīḳhī ḳhāmoshī
ḳhāmoshī ne tujh ko sadā dī shahzāde

ka.ī farhād haiñ juuyā tire shīrīñ lab ke
ka.ī yūsuf haiñ zanaḳhdān ke chāhoñ ke biich

āb-e-tāza ḳhanjar-e-ḳhāmosh ko de
hai burīda lab pe phir fariyād taaza

sāme.a-e-sadā-e-jāñ be-sarokār thā ki thā
ek gumāñ kī dāstāñ bar-lab nīm-vā bhī thī

is zulf-o-ruḳh-o-lab pe unheñ kyuuñ na ho naḳhvat
tātār hai un kā halab un kā yaman un kā

ronā bhī to tarz-e-guftugū hai
āñkheñ jo rukeñ to lab hilā.ūñ

jumbish-e-lab hī ban ga.ī tūfāñ
saiñkaḌoñ harf guftanī hai abhī

jāñ-ba-lab huuñ firāq-dil-bar meñ
sub.h jiitā rahā to shaam nahīñ

tere aage le chukā ḳhusrav lab-e-shīrīñ se kaam
tū abas sar phoḌtā hai kohkan patthar se aaj