Tags-Lucknow

har-chand laakh tarah bhulātā huuñ yaad ko
'aḳhtar' pukār uThtā hai dil haa.e lucknow

kalkatta ke hasīnoñ ko jab dekh letā huuñ
us vaqt dil meñ hotā hai saudā-e-lucknow

marne ke ba.ad bhī na miTegā jigar se daaġh
jannat meñ ham ko ho.egī parvā-e-lucknow

shāhoñ pe faḳhr karte the is mulk ke gadā
thā misl-e-jām-e-jam mai-o-mīnā-e-lucknow

aa.e na mere paas to maiñ aap hī chalūñ
mujh ko ḳhudā kare kahīñ bulvā.e lucknow

hūr-o-parī ko rashk thā ik ek shaḳhs par
be-misl the sabhī mah-e-sīmā-e-lucknow

kyā kyā hasīñ the jam.a paristāñ kā taḳhta thā
nazroñ meñ phirte haiñ ruḳh-e-zebā-e-lucknow

aisā huā huuñ hijr meñ us ke nahīf-o-zār
dekhe agar mujhe vahīñ sharmā.e lucknow

gulshan ajab bahār ke har qasr rashk-e-ḳhuld
aur gomtī ġhazab kī hai dariyā-e-lucknow

arz-e-dakan meñ jaan to dillī meñ dil banī
aur shahr-e-lucknow meñ hinā ban ga.ī ġhazal

hai 'rashīd' ab tak giyāh-e-lucknow mardum giyāh
kyā zamīñ hai jo ujaḌ jaane pe mardum-ḳhez hai

ham haiñ rusvā-kun-e-dillī-o-lucknow apnī kyā zindagī apnī kyā aabrū
'mīr' dillī se nikalne ga.e lucknow tum kahāñ jāoge ham kahāñ jā.eñge

taqdīr meñ thī furqat-e-yārān-e-lucknow
is shahr meñ 'munīr' kahāñ thā kahāñ basant

tire ḳhayāl tirī aarzū se duur rahe
navāb ho ke bhī ham lucknow se duur rahe

mutrib bhī hai sharāb bhī abr-e-bahār bhī
shīrāz ban gayā hai shabistān-e-lucknow

ab us ke ba.ad sub.h hai aur sub.h-e-nau 'majāz'
ham par hai ḳhatm shām-e-ġharībān-e-lucknow

har samt ik hujūm-e-nigārān-e-lucknow
aur maiñ ki ek shoḳh-ġhazal-ḳhvān-e-lucknow

kuchh roz kā musāfir-o-mehmāñ huuñ aur kyā
kyuuñ bad-gumāñ hoñ yūsuf-e-kan.ān-e-lucknow

sabr-āzmā hai ġhamza-e-turkān-e-lucknow
rashk-e-zanān-e-misr kanīzān-e-lucknow

dast-e-junūñ ko rokiye ye ḳhabt chhoḌiye
rusvā hai yūñhī chāk-e-garebān-e-lucknow