Tags-Manzil

kise manzil-e-dilkash-e-dahr meñ
nahīñ miil ḳhātir safar kī taraf

yaar manzil thī mere pairoñ meñ
rahnumāoñ ne raah kar Daalā

manzil kī talab apnī taraf khīñch rahī hai
aur raat musāfir se ye kahtī hai ki ghar jā

jab shauq kī āñkhoñ meñ raqsāñ kaunain ke jalve hote haiñ
manzil vahīñ ḳhud khiñch aatī hai takmīl-e-safar ho jaatī hai

thā ham-safar bhī safar bhī jo merī manzil bhī
usī ko raah kī dīvār kis tarah kartā

'hinā' tum batā do kahāñ hai vo manzil
ye rasta hai kaisā ye kaisī thakan hai

ho teġh-e-asar zanjīr-e-qadam phir bhī haiñ naqīb-e-manzil ham
zaḳhmoñ se charāġh-e-rāhguzar baiThe haiñ jalā.e zindāñ meñ

manzil-e-ishq ye kaisī hai ki ā.īne meñ
apnā chehra bhī tirī yaad dilātā hai mujhe

is manzil-e-dushvār se hans hans ke guzar jā
pagle kahīñ rone se shab-e-hijr Dhale hai

na jaane kaun sī manzil pe ishq aa pahuñchā
duā bhī kaam na aa.e koī davā na lage

haq baat kahī maiñ ne milnī hai sazā mujh ko
jab manzil-e-dār aa.e mumkin nahīñ Dar jā.ūñ

raste kī vahī mushkil manzil kī vahī duurī
aur dil kī vahī hasrat tā-hadd-e-nazar jā.ūñ

dekhnā terī rahbarī ke baġhair
apnī manzil talāsh lūñgā maiñ

ġham-e-duniyā ġham-e-jānāñ ġham-e-manzil ġham-e-rāh
kitne ġham ziist ke hamrāh chalā karte haiñ

lagtā hai ki chhoḌ aayā huuñ manzil kahīñ pīchhe
chaltā hai musalsal yūñhī rasta mire aage

usī se mujh ko milā ishtiyāq manzil kā
mire safar ko fazā-e-safar usī se milī

ufuq tā ufuq nīlgūñ āsmāñ
musāfir parindoñ kī manzil kahāñ

kahāñ zauq-e-tan-āsānī meñ āsānī mayassar thī
talāsh-e-rāhat-e-manzil meñ dil gum-karda manzil thā

manzil mile na koī bhī rasta dikhā.ī de
duniyā faqat ye khel tamāsha dikhā.ī de

paḌe haiñ raah meñ jo log be-sabab kab se
pukārtī hai unheñ manzil-e-talab kab se