Tags-Manzil

manzil-e-maqsūd par pahuñche haiñ sab ke qāfile
sirf merī sa.i-e-paiham rā.egāñ hai aaj bhī

ḳhud aage baḌh ke qadam chūmtī hai manzil-e-shauq
ye kis ne raah dikhā.ī hai kārvānoñ ko

baḌhtī jaatī hai dūrī-e-manzil jab se junūñ ne chhoḌā saath
ab to ḳhirad har gaam par apne pairoñ kī zanjīr huī

mileñge raah meñ aise aise bhī ham-safar 'tābāñ'
qadam qadam jinheñ manzil kī justujū hogī

manzil phir bhī duur rahī
sahrāoñ ko chhān liyā

jis raste meñ tum mil jaao
vo rasta manzil hotā hai

jahāñ manzil to hāsil hai magar apnā nahīñ koī
mujhe kyuuñ aise rastoñ par chalāyā hai muqaddar ne

batā.e kaun kisī ko nishān-e-manzil-e-zīst
abhī to hujjat-e-bāham hai rahguzar ke liye

apnī manzil kā rāsta bhejo
jaan ham ko vahāñ bulā bhejo

manzil-e-mulk-e-baqā meñ 'mashriqī'
dāman-e-nānak na chhoḌā chāhiye

gar nishān-e-manzil-e-jānāñ mile
phir qadam pīchhe na moḌā chāhiye

har manzil-e-hayāt se gum kar gayā mujhe
muḌ muḌ ke raah meñ vo tirā dekhnā mujhe

manzil ke us usuul ko rusvā nahīñ kiyā
raste se lauTne kā irāda nahīñ kiyā

sāhil se duur rah ke hai manzil kī justujū
maujoñ kī fikr ham ko na tūfāñ kī fikr hai

merī manzil kahāñ hai kyā ma.alūm
intihā ġham hai ibtidā ma.alūm

aa.ī manzil to qadam aap hī ruk jā.eñge
ziist ko rāh-e-safar jaan ke chalte rahiye

kitnā fareb-kār hai ehsās-e-bandagī
ham manzil-e-ḳhudī se bahut duur aa ga.e

'hāfiz' ik iztirāb-e-musalsal hai zindagī
is manzil-e-vafā meñ kahīñ pech-o-ḳham nahīñ

jaane kis manzil-e-be-nām kī jānib niklūñ
apnī tanhā.ī se Dartā huuñ mire saath raho

chhup gayā din qadam baḌhā raahī
duur manzil hai muft raat na kar