Tags-Manzil

ġham-e-manzil tujhe shāyad ḳhabar ho
yahāñ pahuñche haiñ kitne kos chal ke

kis samt le ga.iiñ mujhe is dil kī dhaḌkaneñ
pīchhe pukārtī rahīñ manzil kī dhaḌkaneñ

kyuuñ uTheñ paañv junūñ ke sū-e-manzil 'sādiq'
ek ik gaam salāsil kī girāñ-bārī hai

manzil pe le ke pahuñchegā azm-e-javāñ mujhe
kah do na saath le ke chale kārvāñ mujhe

jaane tai manzil-e-shab ho kaise
duur tak nuur kī ḳhushbū bhī nahīñ

ai ḳhudā-e-do-jahāñ ai vo jo har ik dil meñ hai
dekh tere haath kā shahkār kis manzil meñ hai

us ne apnī manzil hāsil kar lī hai
phir kyuuñ ghar kā rasta DhūñDhtā rahtā hai

kyā ishq kī manzil bhī hai kaḌī bañdh bañdh kar himmat TuuT ga.ī
jo ek qadam chal kar sambhlā vo do qadam aage jā ke girā

hameñ le aayā is manzil meñ tere ishq kā jazba
ki ham har ek zarra maz.har-e-shān-e-ḳhudā samjhe

na hogā koī ham sā rahrav-e-rāh-e-vafā 'jauhar'
ham is manzil kī har aafat ko sāmān-e-baqā samjhe

samajh se duur hai jāñ-dādgān-e-ishq kī manzil
fanā kī god meñ sarmāya-e-rāz-e-baqā samjhe

vo jo parvāne jale raat kī raat
manzil-e-ishq se āsāñ guzre

rāste band haiñ manzil hai na rahbar koī
zindagī bhī to usī samt chalī jaatī hai

rahīn-e-manzil-e-vahm-o-gumāñ rahā 'aḳhtar'
isī meñ DhūñDh liyā jāda-e-yaqīñ maiñ ne

kaun manzil ke liye lutf-e-safar ko kho.e
chalte rahne se hī tajdīd-e-rifāqat kar leñ

manzil kī dhun meñ raahī na dekhā na ik nazar
dilkash maqām karte ishāre chale ga.e

hazār manzil-e-ġham se guzar chuke lekin
abhī junūn-e-mohabbat kī ibtidā bhī nahīñ

badan par oḌh kar gard-e-masāfat
ġham-e-manzil chhupānā chāhte haiñ

jo rahnumā the mere kahāñ haiñ vo naqsh-e-pā
manzil pe chhoḌtā thā jo rasta kidhar gayā

manzil darāz-o-dūr hai aur ham meñ dam nahīñ
huuñ rail par savār to dām-o-diram nahīñ