Tags-Manzil

manzil-e-gor meñ kyā jāniye kyā guzregī
taaza vārid haiñ abhī ham ko ḳhabar kuchh bhī nahīñ

jī chāhtā hai thak ke kahīñ baiTh jā.iye
āġhosh-e-pā-e-shauq meñ manzil liye hue

'bāsit' kisī jihat se na ho āshnā magar
halkā sā ik tasavvur-e-manzil liye hue

manzil kā junūñ hai to har ik gaam hai manzil
miTtā hai nishāñ aur kā to miltā hai nishāñ aur

shaam tanhā.ī kī hai aa.egī manzil kaise
jo mujhe raah dikhā de vahī taarā na rahā

aaj tak chaltā rahā jo saath saath
jaane ab vo kaun sī manzil gayā

is dil-e-gum-gashta matlab ke sabab se dahr meñ
kaun sā din thā ki maiñ āvāra-e-manzil na thā

har roz taaza manzil o har shab nayā maqām
mohlat nahīñ qayām kī duniyā hai kyā maqām

nahīñ muhīt-e-rusūm-o-millat hai be-nishāñ manzil-e-haqīqat
vahāñ na simran kī hatkaḌī hai na tauq-e-zunnār hai gulū kā

khulā lab-e-gor se ye uqda ki ḳhvāb thī sab numūd-e-hastī
vuqūf nā-mahrūmī-e-manzil kamāl hai merī justujū kā

kāmyābī kā yaqīñ duur na kar de ham ko
paas manzil ke zarā aur sambhalnā hogā

yaqīñ hai āḳhirī manzil gumāñ kī
yaqīñ kī āḳhirī manzil gumāñ hai

dard-e-jigar kī tum pe musībat paḌī nahīñ
tum to kahoge ishq kī manzil kaḌī nahīñ

junūn-e-be-sar-o-sāmāñ kī zīnat dekhne vaale
mabādā farq aa.e ishq kī tadbīr-e-manzil meñ

jinheñ ho sakā na hāsil kabhī kaif-e-qurb-e-manzil
vahī do-qadam haiñ mujh ko tirī justujū se pyāre

maiñ roz nikal paḌtā huuñ anjāne safar par
manzil ke qarīb aa ke bhī manzil se judā huuñ

zindagī bhar chal ke ham aa.e haiñ manzil ke qarīb
do-qadam ab chal ke manzil ko bhī aanā chāhiye

yā kabhī manzil thī maqsūd-e-mazāq-e-justujū
yā mazāq-e-justujū maqsūd-e-manzil ho gayā

jo nigāh-e-shauq uTThī husn ban kar rah ga.ī
jo qadam ham ne uThāyā naqsh-e-manzil ho gayā

'nazar' kī ek jumbish par matā-e-hosh luTtī hai
jo is manzil meñ khoyā hai use paayā nahīñ jaatā