Tags-Manzil

umr kī is manzil par bhī ham tujh par jaan nichhāvar kar deñ
go vo garmī ḳhuuñ meñ nahīñ hai dil meñ qayāmat ab bhī vahī hai

ham chal paḌe haiñ manzil-e-maqsūd ke liye
ab sañg dekhnā hai na dīvār dekhnā

junūñ kī koī manzil hī nahīñ hai
yahāñ har gaam gām-e-avvalīñ hai

raah chaltā huuñ irādoñ ke saath shauq ke saath murādoñ ke saath
paañv hote haiñ qarīb-e-manzil vaqt hāthoñ se nikal jaatā hai

nahīñ miltī tujhe manzil to shikāyat kaisī
ye bhaTaknā tirī ġhaflat se ziyāda hai bahut

fikr kyuuñ hai qayām karne kī
koī manzil nahīñ Thaharne kī

dil-e-raushan ko samajh ka.aba-nashīñ kī manzil
dair kahte haiñ kise aur kalīsā kyā hai

bas ruk gayā to ruk gayā ulfat kī raah meñ
manzil na kar qubūl ki manzil fareb hai

tamannāoñ ke mele ab nahīñ lagte kabhī dil meñ
kashish baaqī rahī koī na rāhoñ meñ, na manzil meñ

rāhi-e-mulk-e-adam haiñ nahīñ fikr-e-manzil
qasd rakhte haiñ udhar kā ki jidhar kuchh bhī nahīñ

duniyā thī rahguzar to qadam mārnā thā sahl
manzil huī to paañv kī zanjīr ho ga.ī

shāyad isī liye mujhe manzil na mil sakī
mujh ko tumhārī rāhguzar der se milī

safar kā marhala jo ho jahāñ par likh diyā jaa.e
usī manzil pe aa kar zindagī kā dam nikaltā hai

junūñ-jaulān-e-dasht-e-justujū huuñ kyā ḳhabar is kī
milī manzil kahāñ mujh ko chhuTī manzil kahāñ mujh se

har ik Thokar kī zad meñ laakh manzil
hameñ DhūñDo nasīb-e-gumrahāñ ham

ishq kī manzil meñ lākhoñ kārvāñ gum ho ga.e
rahrav-e-rāh-e-mohabbat kyā kareñge justujū

maqām-e-fanā vāqiye meñ jo dekhā
asar bhī na thā gor manzil kā apne

jis kī bhī jo manzil hai vahīñ tak ye gayā hai
raahī kī badaulat huā rastā mut.harrik

har taraf phailā huā be-samt be-manzil safar
bhiiḌ meñ rahnā magar ḳhud ko akelā dekhnā

aap kā koī safar be-samt be-manzil na ho
zindagī aisī na jiinā jis kā mustaqbil na ho