Tags-Manzil

had ko pahuñch ga.ī hai mirī nā-mardiyāñ
manzil ke paas aa ke qadam Dagmagā.e haiñ

jo chal paḌe the azm-e-safar le ke thak ga.e
jo laḌkhaḌā rahe the vo manzil pe aa.e haiñ

aao musāfirān-e-adam aao ghar chaleñ
manzil hamārī duur hai ārām kyā kareñ

nahīñ hai manzil-e-maqsūd ab ziyāda duur
sambhāl ḳhud ko qadam se mire qadam to milā

manzil pe pahuñchne kā mujhe shauq huā tez
rasta milā dushvār to maiñ aur chalā tez

aa ga.ī ai nā-murādī vo bhī manzil aa ga.ī
mujh ko kyā samjhā.eñge vo un ko samjhātā huuñ maiñ

shauq-e-manzil ham-safar hai jazba-e-dil rāhbar
mujh pe ḳhud bhī khul nahīñ paatā kidhar jaatā huuñ maiñ

kaTte bhī chalo baḌhte bhī chalo baazū bhī bahut haiñ sar bhī bahut
chalte bhī chalo ki ab Dere manzil hī pe Daale jā.eñge

darpesh hai juuñ ashk safar ham ko tarī kā
din raat chale jaate haiñ manzil nahīñ ma.alūm

baat dushvārī-e-manzil kī na.ī baat nahīñ
raah pahle bhī thī kāñToñ se bharī aaj bhī hai

taskīn ko dhokā dete haiñ nākām tamannā ye kah kar
har-gām pe manzil hotī hai har mauj meñ sāhil hotā hai

fareb-ḳhurda-e-manzil hai kārvāñ varna
ziyāda rāhat-e-manzil se hai nashāt-e-rahīl

kārvāñ manzil-e-maqsūd pe pahuñchātā kyā

rah-e-darāz hai aur duur shauq kī manzil
garāñ hai marhala-e-umr giit gaatā jā

ḳhirad hai āḳhirī manzil junūñ kī
pareshāñ kyuuñ ho merī āgahī se

be-nām masāfat hī muqaddar hai to kyā ġham
manzil kā ta.ayyun kabhī hotā hai safar se

kārvāñ hai yā sarāb-e-zindagī hai kyā hai ye
ek manzil kā nishāñ ik aur hī jaada lagā

sub.h se chalte chalte āḳhir shaam huī āvāra-e-dil
ab maiñ kis manzil meñ pahuñchā ab ghar kitnī duur rahā

har qadam ke saath manzil lekin is kā kyā ilaaj
ishq hī kam-baḳht manzil-āshnā hotā nahīñ

har milan judā.ī kī avvalīn manzil hai
vasl hī se juḌtā hai silsila bichhaḌne kā