Tags-Manzil

yahī vo manzil-e-dushvār hai jis manzil meñ
ḳhatm har marhala-e-sūd-o-ziyāñ hotā hai

milī hai aur hī ta.abīr aa ke manzil par
vo aur ḳhvāb the raste meñ jo dikhā.e ga.e

har aqīdat kī ek manzil hai
har jabīñ āstāñ talāsh kare

hazrat-e-ḳhizr pareshāñ na ho ārām kareñ
ham bhī ab manzil-e-ārām tak aa pahuñche haiñ

koī manzil kaise tanhā sar kareñ
ham-safar meñ ham-safar maujūd hai

sukūt-e-shām se pahle kī manzil saḳht hotī hai
kaho logoñ se sūraj ko na yuuñ Dhaltā huā dekheñ

manzil-e-ishq na ḳhāk-e-shab-e-hijrāñ meñ milī
jāda-e-rañj meñ khiñchtā rahā naala merā

ajab nahīñ ki shahādat talab kare manzil
karo paḌāv to gard-e-safar bhī saath rakho

jab uḌā jānib-e-manzil 'aḳhtar'
ek sho.ala mire par se niklā

mujh ko manzil bhī na pahchān sakī
maiñ ki jab gard-e-safar se niklā

bhaTak rahe haiñ bhaTakte raheñge farzāne
qarīb aa ga.e manzil ke tere dīvāne

dil kī māyūs tamannāoñ ko mar jaane do
dard ko āḳhirī manzil se guzar jaane do

ab na zauq-e-rah-navardī hai na lutf-e-māñdgī
aisā lagtā hai ki manzil par savārī aa ga.ī

merī hastī shauq-e-paiham merī fitrat iztirāb
koī manzil ho magar guzrā chalā jaatā huuñ maiñ

har ek rāh-e-junūñ se guzre har ek manzil se kuchh uThāyā
kahīñ se dāman meñ ġham sameTā kahīñ se jholī meñ pyaar laa.e

ham be-ḳhudī meñ kaun sī manzil pe aa ga.e
Thahrā huā hai vaqt bhī raftār chhoḌ kar

raah par aa hī ga.e aaj bhaTakne vaale
rāhbar dekh vo manzil kā nishāñ hai ki nahīñ

ba.ad mere na rahā ishq kī manzil kā nishāñ
miT ga.e rāh-rau o rāhguzar donoñ saath

na kisī ko fikr-e-manzil na kahīñ surāġh-e-jāda
ye ajiib kārvāñ hai jo ravāñ hai be-irāda

ai ham-safaro DhūñDh lo āsānī-e-manzil
apnā to ye dil ḳhūgar-e-mushkil-talabī hai