Tags-Manzil

mirī raah manzil ne kyuuñ rok lī hai
abhī lutf aane lagā thā safar meñ

aah vo manzil jo merī ġhaflatoñ se gum huī
haa.e vo rahbar jo mujh ko raah se bhaTkā ga.e

use kyā ḳhabar ki shikastagī hai junūñ kī manzil-e-āgahī
jo matā-e-shīsha-e-dil liye sar-e-kū-e-yār nahīñ gayā

ab bhī abbās kā parcham hai mirī mahfil meñ
jāda-paimā hai 'niyāz' ab bhī mirī manzil meñ

paate haiñ vahī maqsūd-e-nazar miltī hai unheñ manzil un kī
jo un kī tamannā meñ har dam ḳhud apnī tamannā karte haiñ

tarīq-e-ishq meñ kyuuñ bār-e-ġham uThā.e na dil
isī pahāḌ ke nīche hai manzil-e-maqsūd

ye dasht-e-haul-ḳhez ye manzil kī dhun ye shauq
ye bhī ḳhabar nahīñ ki kahāñ raat ho ga.ī

is gaam se us gaam tak zanjīr-e-ġham ke fāsle
manzil to kyā ham ko mile, chaltā rahe rastā tirā

kahāñ hogā Thikānā barq-raftārī un kī vahshat kā
ki vo manzil ko bhī sañg-e-rah-e-manzil samajhte haiñ

gumāñ kāshāna-e-rañgīñ kā hai jis par nigāhoñ ko
use ahl-e-nazar gard-e-rah-e-manzil samajhte haiñ

us kī manzil kā patā kis ko milā hai ab tak
haañ vahī bedil-e-barlās javāñ-tar ho jaa.e

ham to manzil ke talabgār the lekin manzil
aage baḌhtī hī ga.ī rāhguzar kī sūrat

jo ham-safar bhī rahe haiñ sharīk-e-manzil bhī
kuchh ajnabī to na the phir bhī kam ko pahchāne

hazār kos nigāhoñ se dil kī manzil tak
koī qarīb se dekhe to ham ko pahchāne

ārām-o-musībat kyā shai hai hotā nahīñ kuchh ehsās unheñ
manzil kī jo dhun meñ haiñ 'sābir' din-rāt vo chalte rahte haiñ

jaan jā.egā ki manzil nahīñ maujūd kahīñ
ḳhush-gumāñ hai abhī sargarm-e-safar jā.egā tū

begāna-sifat jāda-e-manzil se guzar jā
har chiiz sazā-vār-e-nazāra nahīñ hotī

shor-e-dariyā-e-vafā-e-ishrat ishrat-e-sāhil ke qarīb
ruk ga.e apne qadam aa.e jo manzil ke qarīb

na sāthī hai na manzil kā pata hai
mohabbat rāsta hī rāsta hai