Tags-Manzil

dīvānoñ ko manzil kā patā yaad nahīñ hai
jab se tirā naqsh-e-kaf-e-pā yaad nahīñ hai

josh-e-junūñ ne manzil-e-maqsūd pā liyā
aql-e-salīm dekhtī hī dekhtī rahī

lā.egī rañg laġhzish-e-pā dekhte raho
manzil bhī degī apnā patā dekhte raho

āgahī roz Darātī rahī manzil se magar
hausla paañv kī zanjīr meñ rakkhā gayā thā

kisī ko manzil-e-ishrat kā ġham hai aur mujhe
huī hai manzil-e-ishrat pe kārvāñ kī talāsh

junūn-e-ishq kī manzil se vāqif hī nahīñ koī
hamārī chāk-dāmānī pe duniyā muskurātī hai

donoñ afsāna-ḳhvāñ gird mahmil ke the qais sahrā kā thā ḳhizr manzil ke the
'maz.harī' bhī ġhulām apne hī dil ke the in divānoñ meñ koī tumhārā na thā

husain naam hai ik raushnī ke paikar kā
husain fikr-e-bashar kī aziim manzil hai

ye tañgnā.e-dahr nahīñ manzil-e-farāġh
ġhāfil na paañv hirs ke phailā sukeḌ tū

ai shahr-e-rasan-basta
kyā ye tirī manzil hai

manzil-e-ishq ke rāhbar kho ga.e
mere hamdam mire ham-safar kho ga.e

apne kāshāne se kyuuñ ġhair ke ghar ho aa.e
māh-rū aap kī manzil kabhī aisī to na thī

qarīb-o-dūr vahm-e-nā-rasā.ī
kabhī manzil kabhī ḳhud kārvāñ gum

rahī sahrā-ba-sahrā terī manzil
hue manzil-ba-manzil kārvāñ gum

junūñ kī had hai ki hosh-o-ḳhirad kī manzil hai
ḳhabar nahīñ hai kahāñ aaj aa ke baiThe haiñ

ik nuur kī duniyā hai mirī shauq kī manzil
har zarre ko ḳhurshīd-e-nazar dekh rahā huuñ

manzil-e-maqsūd par pahuñche vahī
raah meñ jo Thokareñ khāte rahe

qāfile manzil-e-mahtāb kī jānib haiñ ravāñ
merī rāhoñ meñ tirī zulf ke bal aate haiñ

'hāmid' ham apnī manzil-e-gum-nām kyā kahīñ
uTThe jidhar bhī paañv usī samt chal paḌe

pesh-e-nazar thī manzil-e-jānāñ kī justujū
aur phir rahā huuñ apnā pata DhūñDtā huā