Tags-Manzil

phir vahī johd-e-musalsal phir vahī fikr-e-ma.āsh
manzil-e-jānāñ se koī kāmyāb aayā to kyā

sameT apnā dāman na āġhosh-e-manzil
ki rahrav pas-e-kārvāñ aur bhī haiñ

sochte rahne se to manzil kabhī miltī nahīñ
chalte jaao rāste se rāsta mil jā.egā

yārān-e-tez-gām se ranjish kahāñ hai ab
manzil pe jā pahuñchne kī ḳhvāhish kahāñ hai ab

shāyad aise hī be-manzil rahnā apnī qismat hai
ham kis raste ko apnā.eñ har ik rasta bikhrā hai

yuuñ sambhāl kar rakh lī dil meñ dhuul yādoñ kī
kārvāñ kī manzil ho gard-e-kārvāñ jaise

dostī kī ye manzil hai vabāl-e-jāñ kitnī
baat baat par abrū khiñch ga.e kamāñ jaise

jo manzil aaj ahl-e-hosh kī hai
vo dīvānoñ kī Thukrā.ī huī hai

ai ham-safarāñ pesh-ravī kī nahīñ tāqat
kyā kiije hameñ dūri-e-manzil ne satāyā

jo raste meñ luTe un kī taraf bhī
sar-e-manzil pahuñch kar dekh lenā

ek ik kar ke hue jaate haiñ taare raushan
merī manzil kī taraf tere qadam aate haiñ

safar kī lazzat se baḌh ke manzil kā qurb to mo'tabar nahīñ hai
vo mil gayā aur maiñ abhī tak galī galī ḳhaak uḌā rahā huuñ

bahut duur manzil magar har qadam par
thakan kā taqāzā ki manzil yahī hai

manzil ko chale yā kisī maqtal ko chale haiñ
har raah yuuñ lagtī hai ki zanjīr paḌī hai

lillāh koī koshish na kare ulfat meñ mujhe samjhāne kī
jalne ke alāva aur koī manzil hī nahīñ parvāne kī

is manzil-e-jahāñ ke bāshinde raftanī haiñ
har ik ke haañ safar kā sāmān ho rahā hai

hazār kos nigāhoñ se dil kī manzil tak
koī qarīb se dekhe to ham ko pahchāne

hoñge manzil se ham-āġhosh ye ummīd bañdhī
rāste meñ koī patthar nahīñ aayā ab tak

niind aa ga.ī thī manzil-e-irfāñ se guzar ke
chauñke haiñ ham ab sarhad-e-isyāñ se guzar ke

ik nishtar-e-ġham aur sahī ai ġham-e-manzil
aa dekh to ik roz rag-e-jāñ se guzar ke