Tags-Manzil

ka.ī paḌāv the manzil kī raah meñ 'tābish'
mire nasīb meñ lekin safar kuchh aur se the

manzil-e-ishq kī rāheñ haiñ bahut hī dushvār
har qadam par na.e āzār nazar aate haiñ

gumrāhiyoñ kā lapkā kuchh aisā paḌā ki ham
manzil qarīb aa.ī to rahbar se kaT ga.e

koshish-e-manzil se to achchhī rahī dīvāngī
chalte-phirte un se milne kā maqām aa hī gayā

pal meñ manzil pe uḌā laa.e fanā ke jhoñke
lutf rah rah ke bahar-gām to lene dete

naumīd kare dil ko na manzil kā patā de
ai rah-guzar-e-ishq tire kyā haiñ irāde

usī manzil meñ aate haiñ kahīñ dair-o-haram 'ārif'
harīm-e-dil se bach kar āstāñ baaqī nahīñ rahtā

manzil hai kahāñ kuchh yaad nahīñ kis samt hai jaanā yaad nahīñ
ab terā pata ham kyā pūchheñ ḳhud apnā Thikānā yaad nahīñ

manzil-e-āḳhirī hai qabr mirī
ab koī rāsta nahīñ miltā

maiñ is hālat meñ 'zeb' āḳhir kahāñ chalte hue jā.ūñ
na mujh meñ hausla baaqī na manzil hai na jaada hai

vafā se manzil-e-tark-e-vafā tak aa nikle
kisī bahāne to patthar kabhī gudāz to ho

be-manzil-e-maqsud maiñ ġhaltāñ huuñ safar meñ
afsos zamāne tū chalā hai mire pīchhe

rivāq-e-kahkashāñ se bhī ho aage tak guzar terā
ki terā ishq hai manzil tirī azm-e-safar terā

tab kahīñ paayā kisī ne us kī manzil kā pata
jab masāfat qat.a kī ḳhud ko sarāsar kaaT kar

pahuñch ke jo sar-e-manzil bichhaḌ gayā mujh se
vo ham-safar thā magar ham-nazar na thā merā

jo dil mirā nahīñ mujhe us dil se kyā ġharaz
chalnī na ho jo raah to manzil se kyā ġharaz

nashāt-e-manzil nahīñ to un ko koī sā ajr-e-safar hī de do
vo rah-navard-e-rah-e-junūñ jo pahan ke rāhoñ kī dhuul aa.e

sāmne manzil aa ga.ī lekin
aage kyā hai soch rahā huuñ

manzil se hai itnā ta.alluq
miil kā patthar ban ke khaḌā huuñ

mujhe samajhne kī manzil hai muntazir un kī
yaqīnī baat hai pāgal kī aas pāgal haiñ