Tags-Manzil

jahāñ pe jalva-e-jānāñ hai anjuman-ārā
vahāñ nigāh kī manzil tamām hotī hai

jis pe chalne kā sila hai manzil-e-amn-o-sukūñ
khīñch dī hai vaqt ne us raah meñ dīvār dekh

vo pyaar bharī ik manzil thī tā-hadd-e-nazar the phuul khile
tan-man meñ jvālā bharte the manzar rañgīle yaad karo

fahm-o-ḳhirad se josh-e-junūñ tak har manzil se guzre haiñ
ham to dīvāne haiñ bhaa.ī ham ko kyā samjhā.e hai

vādi-e-ġhurbat meñ yuuñ gum-karda manzil thā 'shakīl'
rahzan-e-manzil ko ḳhizr-e-kārvāñ samjhā thā maiñ

vo jafāoñ pe sharmsār na hoñ
ab ye manzil mujhe garāñ bhī nahīñ

manzil-e-yār be-nishāñ bhī nahīñ
dil ho ġhāfil to rāz-dāñ bhī nahīñ

jā rahā hai apnī manzil kī taraf māh-e-tamām
jaise qabroñ ke mujāvir jaise masjid ke imaam

pahuñch to saktā thā manzil pe maiñ magar ai dost
maiñ dūsroñ ke liye rāsta banā huā huuñ

javānī jā rahī hai aur maiñ mahv-e-tamāshā huuñ
uḌī jaatī hai manzil aur Thahartā jā rahā huuñ maiñ

ġhāliban mere alāva koī guzrā bhī nahīñ
terī manzil meñ kahīñ naqsh-e-kaf-e-pā bhī nahīñ

kuchh manzil kā ġham baḌh jaatā kuchh rāheñ mushkil ho jātīñ
is taptī dhuup meñ zulfoñ kā saaya na milā achchhā hī huā

haa.e vo ik ashk jis kī koī manzil hī nahīñ
haa.e vo ik be-zabāñ jo ghar se be-ghar ho gayā

pahuñch ga.e sar-e-manzil chale jo chaal na.ī
unhīñ meñ pher thā dekhī huī jo rāheñ thiiñ

mujh se bāhar mirā surāġh nahīñ
maiñ ki manzil bhī huuñ nishāñ bhī huuñ

dam na lene kī qasam khaa.ī hai maiñ ne 'razmī'
mujh ko manzil bhī pukāre to guzar jā.ūñgā

ḳhud pukāregī jo manzil to Thahar jā.ūñgā
varna ḳhuddār musāfir huuñ guzar jā.ūñgā

rāste to haiñ magar manzil nahīñ
kyā hamāre rāhbar kī baat hai

nāsehā gar ho sake manzil pe mil
zindagī to rah-guzar kī baat hai

ajiib baat ki manzil kā jab bhī qasd huā
bajā.e paañv ke haath uTh ga.e duā ke liye