Tags-Mashwara

mashvara ye bhī to hai duniyā kā
koī achchhā hai to achchhā kyuuñ hai

sharāb pī ke baḌe tajarbe hue haiñ hameñ
sharīf logoñ ko ham mashvara nahīñ deñge

sū-e-adab na Thahre to deñ koī mashvara
ham mutma.in nahīñ haiñ tirī kā.enāt se

samajh meñ kuchh nahīñ aatā samundar jab bulātā hai
kisī sāhil kā koī mashvara achchhā nahīñ lagtā

mushkil ke vaqt dil hī se kuchh mashvara kareñ
kyuuñ deñ kisī ko ġhair se ham pūchh kar javāb

dīda-varān-e-but-kada ik mashvara to do
ka.aba jhalak yahāñ bhī dikhā.e to kyā karūñ

tum achchhī dost ho so merā mashvara ye hai
milā-julā na karo 'fāris'-e-ḳharāb ke saath

kuchh is pe sochnā thā mashvara bhī karnā thā
muāmle pe abhī tabsira bhī karnā thā

is jazba-e-dil ke baare meñ ik mashvara tum se letā huuñ
us vaqt mujhe kyā lāzim hai jab tujh pe mirā dil aa jaa.e

mushkil kī is ghaḌī meñ karūñ kis se mashvara
kuchh dost haiñ to vo bhī fasāna-nigār haiñ

mashvara lene kī naubat hī nahīñ aa paatī
ek se ek samajhdār paḌā hai mujh meñ

ġhazab kā mashvara de kar hai vo ab tak ġhazab shā.ir
baḌe logoñ se milne meñ hamesha fāsla rakhnā

aa.iye naza.a kā hañgām hai ab
mashvara aap se kuchh karnā hai

mile ba-sa.ī-e-rafū aur uThe garebāñ-chāk
ye mashvara huā logo ki ishti.āl huā

mashvara maujoñ se luuñ us paar jaanā hai mujhe
nā-ḳhudāoñ kā to kahnā hai safīna chāhiye

mire dost tujh ko hai kyā patā tujhe de rahe haiñ jo mashvara
yahī log jashn manāeñge mirī jiit par tirī haar par

karoge zulm kab tak mashvara hai baaz aa jaao
bahut pachhtāoge tum zulm kī gar intihā hogī

kyā iḳhtiyār apnā majbūriyoñ pe dil kī
maanā ki mashvara hai nāseh kā muḳhlisāna

miTTī se mashvara na kar paanī kā bhī kahā na maan
ai ātish-e-darūñ mirī pābandī-e-havā na maan

ḳhair kī baat hai ye samjhā kar
mashvara mashvara hai chal uTh jā