Tags-Masti

zauq-e-mastī kī mazammat na kar itnī ai shaiḳh
kyā tujhe nashsha-e-zauq-e-mai-e-ulfat bhī nahīñ

kaif bhī hai mastī bhī zahr bhī hai amrit bhī
vo jo jām-e-sāqī se roz Dhaltī rahtī hai

kahīñ par zindagī kā nām-e-nāmī mauj-mastī hai
kahīñ par ādamiyat zinda rahne ko tarastī hai

vo duniyā sham-e-āzādī ke parvānoñ kī bastī thī
jahāñ fitrat sañvartī thī jahāñ mastī barastī thī

ham ko mastī o ḳhvārī aa.ī
tum ko duniyā-dārī aa.ī

ik barq-e-siyah-mastī ik sho.ala-e-mad-hoshī
miinā se girānā hai sāġhar se uThānā hai

fazā umDī huī hai ik chhalakte jaam kī mānind
havā maḳhmūr hai bādal ġharīq-e-rañg-o-mastī haiñ

Thahrā.ī hai ab hāl-e-ġham-e-dil ne ye sūrat
mastī kī tarah dīda-e-mai-nosh meñ rahiye

jab se dekhā hai is faqīrnī ko
fāqa-mastī se ishq ho gayā hai

kuchh aisī tauba-shikan har ik baat us but-e-lā-javāb kī hai
hai gesuoñ meñ ghaTā kā aalam nazar meñ mastī sharāb kī hai

un ke maiḳhāne ko chhū aatī hai jab fasl-e-bahār
phuul khil jaate haiñ mastī meñ havā hotī hai

hamārī fāqa-mastī āsmāñ ke peT bhartī hai
ham apne paañv ke nīche ḳhazāna chhoḌ dete haiñ

mai-ḳhāna-e-ḳhayāl meñ mastī kā josh thā
gul thā charāġh-e-aql meñ gum-karda hosh thā

ham ā.īna haiñ haq ke haq ā.īna hai apnā
mastī meñ apnī har dam dam haq kā mārte haiñ

dekh achchhī nahīñ ye ḳhar-mastī
sāġhar-e-bāda-e-fursat mat toḌ

masti-e-gām bhī thī ġhaflat-e-anjām ke saath
do ghaḌī khel liye gardish-e-ayyām ke saath

bār-hā dekhī hai un kūchoñ ne shab-mastī mirī
aaj bhī ik ghar ke bām-o-dar shanāsā haiñ vahāñ

havas mastī kī 'sā.il' ko nahīñ kaafī hai thoḌī sī
pyāle meñ agar pas-ḳhurda-e-pīr-e-muġhāñ rakh dī

gar yuuñ hī ġhālib rahā ham par suḳhan kā qarz ye
''rañg lā.egī hamārī fāqa-mastī ek din''

dasht meñ uḌte bagūloñ kī ye mastī ek din
ek din hai sar-bulandī aur pastī ek din