Tags-Mausam

be-sabab to nahīñ thā āñkhoñ meñ
ek mausam ki lā-zavāl sā thā

kahā maiñ ne khileñge kab vafā ke phuul
javāb aayā abhī mausam ḳhizānī hai

kitne mausam ke chhalāve se guzar kar pahuñchī
us Dagar pe ki jahāñ log mujhe yaad kareñ

vaqt ke marmarīñ patthar pe ġhazal likhtā huuñ
ye ibārat koī mausam to miTāne se rahā

mere andar kā pāñchvāñ mausam
kis ne dekhā hai kis ne jaanā hai

kyā mausam-e-gul par itrā kar ham gaa.eñ tarāna phūloñ kā
do roz meñ aane vaalā hai ik roz zamāna phūloñ kā

nahīñ hai rahnā use bhī bahār meñ 'tāhir'
mujhe bhī mausam-e-shādāb se nikalnā hai

koī mausam ho un zulfoñ kī ḳhushbū le hī aatī hai
havā-e-shauq dil ke zaḳhm ko bharne nahīñ detī

tirī vafāoñ ke mausam badalte rahte haiñ
mirī vafā kā chaman bas tujhe nihārtā hai

tire tasavvur kī dhuup oḌhe khaḌā huuñ chhat par
mire liye sardiyoñ kā mausam zarā alag hai

aise mausam meñ vo chup-chāp nazar jo aayā
us ne ā.ankhoñ meñ koī shakl basā lī hogī

mausam-e-yād kā koī jhoñkā, ab jo guzre tumhārī ḳhalvat se
soch lenā hamāre baare meñ, par hamārā malāl mat karnā

pūchh bārish se vo hañste hue roī kyoñ hai
mausam us ne to nasha-bār zarā karnā thā

ye barsāt ye mausam-e-shādmānī
ḳhas-o-ḳhār par phaT paḌī hai javānī

vīrāniyāñ tanhā.iyāñ mausam hai ḳhizāñ kā
anvār karo dil kī havelī to batā.ūñ

havā kā haath kyā ātish-e-badan hai jo saf-e-gul
ho mausam koī bhī ye to vahī sho.ala-ba-jāñ hai

chāroñ jānib pāgal-ḳhāne lagte haiñ
mausam aise hosh uḌāne lagte haiñ

hamāre sar pe baras jā.eñge kahāñ patthar
tunak-mizājī-e-mausam kā e'tibār nahīñ

ġhazal kahne kā mausam 'qāsmī' ab ho gayā ruḳhsat
sukūn-e-qalb to us kī sanā-ḳhvānī meñ rakkhā hai

ye mausam-e-gul garche tarab-ḳhez bahut hai
ahvāl-e-gul-o-lāla ġham-añgez bahut hai