Tags-Mausam

mausam-e-gul kī rānā.ī ne dasht meñ Dere Daale haiñ
tum bhī 'ravish' ab ghar se niklo rut aa.ī hai bahāroñ kī

tere va.adoñ ne hameñ ghar se nikalne na diyā
log mausam kā maza le ga.e barsātoñ meñ

mausam-e-girya ek guzārish hai
ġham ke pakne talak Thahr mujh meñ

yuuñ lage dard kī is dil se shanāsā.ī hai
mausam-e-ġham kī tabhī to ye lahar aa.ī hai

mirī zabān ke mausam badalte rahte haiñ
maiñ aadmī huuñ mirā e'tibār mat karnā

mausam-e-saffāk ne vo sub.h raushan kī hai 'nāz'
qatra-e-shabnam sar-e-shāḳh-e-gul-e-tar so gayā

dīvār-o-dar-o-bām kī vīrānī ne akasr
ro ro ke kahī mausam-e-rafta kī kahānī

josh vahshat kā huā mausam-e-gul aa pahuñchā
kuchh dinoñ hosh meñ rahtā huuñ sambhal jaatā huuñ

kyuuñ hai bekār mausam-e-gul meñ
jeb kar chaak aur garebāñ phaaḌ

kahāñ ho aao mirī bhūlī-bisrī yaado aao
ḳhush-āmdīd hai mausam udaas hone kā

tū chhoḌ ab to asīr-e-qafas ko ai sayyād
kalī chaTakne lagī mausam-e-gulāb aayā

ye ḳhushk patte ki jaise rāhoñ meñ lafz bikhre
udaas mausam meñ in daraḳhtoñ kī shā.irī hai

vo chāñdnī-shab phūloñ kī mahak vo ThanDī havāoñ ke jhoñke
tū itnī jaldī bhuul gayā mausam vo suhānā yaad nahīñ

mausam bhī ḳhush-gavār zamāna bhī raas hai
lekin tire baġhair mirā jī udaas hai

palkoñ pe intizār kā mausam sajā liyā
us se bichhaḌ ke rog gale se lagā liyā

aañsū gire to ḳhāk-e-badan se ḳhushbū phūTī thī
meñh barsā to mausam ne garmānā chhoḌā thā

koī mausam bhī ham ko raas nahīñ
vo nahīñ hai to kuchh bhī paas nahīñ

muddatoñ se jo mo.attar thā vo daftar kaaT kar
zard mausam likh diyā satar-e-gul-e-tar kaaT kar

saare mausam ek jaise ho ga.e
ab ye dil hañstā nahīñ rotā nahīñ

aslī baat pe kyā phal aatā hāhā-kār ke mausam meñ
sab ne baaġh lagā rakkhā hai apne apne matlab kā