Tags-Mausam

ye mausam kā taqāza aur bhīgī shab kī hasrat hai
badalnā ishq meñ hai āḳhirī pahlū zarā Thahro

qaid-e-mausam nahīñ naġhmāt-e-anā dil ke liye
koī mausam ho gul-e-tar kī zabāñ ho jaanā

ruḳhsat-e-mausam-e-gul ke bhī uThāo sadme
itnā āsāñ nahīñ ehsās-e-ḳhizāñ ho jaanā

ye mausam surma.ī hai aur maiñ huuñ
magar bas ḳhāmushī hai aur maiñ huuñ

nahīñ hai sahl is qadar ki jī sake har ek shaḳhs
balā-e-hijr kī rutoñ se mausam-e-visāl tak

mere paas se uTh kar vo us kā jaanā
saarī kaifiyyat hai guzarte mausam sī

koī mausam bhī sazā-vār-e-mohabbat nahīñ ab
zard pattoñ ko havāoñ se shikāyat nahīñ ab

shahr-e-tanhā.ī meñ mausam nahīñ badlā karte
din bahut chhoTā yahāñ raat baḌī hai ab bhī

rañg pairāhan kā ḳhushbū zulf lahrāne kā naam
mausam-e-gul hai tumhāre baam par aane kā naam

badal rahī hai qafas meñ havā agar 'panchhī'
to maqtaloñ meñ bhī mausam badal rahā hogā

ye vo mausam hai jis meñ koī pattā bhī nahīñ hiltā
dil-e-tanhā uThātā hai sa.ūbat shām-e-hijrāñ kī

mausam-e-gul zard hai ḳhūn-e-tamannā ke baġhair
naqd-e-jāñ le kar chaman meñ sarfaroshāna chalā

phuul shāḳhoñ pe khile aap se aur phir na mile
mausam-e-hijr na kuchh tū ne bhī sochā dekhā

ye sardiyoñ kā udaas mausam ki dhaḌkaneñ barf ho ga.ī haiñ
jab un kī yaḳh-bastagī parakhnā tamāzateñ bhī shumār karnā

maiñ shajar-kārī ke mausam meñ ugātī koī peḌ
aur mohabbat se parindoñ ko bulāyā kartī

ye tilism-e-mausam-e-gul nahīñ ki ye mojaza hai bahār kā
vo kalī jo shāḳh se gir ga.ī vo sabā kī god meñ pal ga.ī

merā chehra dekhne vaalo paḌhnā bhī to sīkho nā
kitne mushkil mausam kaaTe aur un ko tafsīr kiyā

tujh se bichhaḌ ke zindagī ho jā.egī tavīl
ehsās ke nikhār kā mausam na aa.egā

vāda-ḳhilāfiyoñ ko taras jā.egā yaqīñ
rātoñ ko intizār kā mausam na aa.egā

chhalke sharāb barq gire yā jaleñ charāġh
zikr-e-nigāh-e-yār kā mausam na aa.egā