Tags-Mausam

ashk āñkhoñ meñ aur dil meñ aahoñ ke sharar dekhe
barsāt ke mausam meñ jalte hue ghar dekhe

ajab tarah kā hai mausam ki ḳhaak uḌtī hai
vo din bhī the ki khile the gulāb āñkhoñ meñ

ġham ke mausam meñ kyoñ kar lī ham ne in ġhazloñ se yaarī
ab to saarī umr kaTegī ashk-bayānī karte karte

nasha nasha sā havā.eñ rachā.e phirtī haiñ
khilā khilā sā hai mausam tire sañvarne kā

phuul shāḳhoñ pe koī khil hī nahīñ paayā thā
mausam-e-vasl kisī hijr kī saḳhtī jaisā

koī mausam ho mire ghar meñ 'rafīq'
vahī sahrāoñ kā manzar dekho

mausam ne ruḳhsatī jo sunā.ī bahār kī
bhar aa.ī aañkh gul hī nahīñ ḳhaar ḳhaar kī

nuzūl-e-mausam-e-tahqīr-e-jāñ se bachne kī
gulāb aise badan ne duā nahīñ māñgī

mausam-e-gul hai to kirdār-e-chaman kyuuñ badle
aag phūloñ ko to shabnam ko sharar kar dekho

ḳhayāl-e-mausam-e-gul bhī nahīñ sitamgar ko
bahār meñ bhī shajar kāTne ko aatā hai

merī mastī meñ sarshārī terī hai
mere andar tere mausam mī raqsam

mausam-e-gul meñ yahīñ josh-e-junūñ kī hai bahār
rañg lā kar ā.eñge sau baar qaisar-bāġh meñ

'zafar' ab ke suḳhan kī sarzamīñ par hai ye mausam
bayāñ ġhā.eb hai aur rañg-e-bayāñ phailā huā hai

mausam-e-gul meñ sar-e-shāḳh-e-gul
sho.ala bhaḌke to bajā lagtā hai

muayyan thā yahī mausam milan kā
maiñ akasr sochtā huuñ bārishoñ meñ

jab ḳhushī kā mausam thā ham-safar thā ik aalam
kāTnī hai ab lekin ġham kī rahguzar tanhā

piilī piilī rut judā.ī kī achānak aa.egī
qurbatoñ kā sabz mausam bevafā ho jā.egā

dil ke pyāse āñgan meñ kal yaad ke bādal yuuñ aa.e
der talak ye tan-man bhīgā be-mausam barsāt huī

nazar azāboñ meñ ghir ga.ī hai suḳhan sarāboñ meñ aa gayā hai
sunā hai ab ke bahār-mausam ḳhizāñ kī bātoñ meñ aa gayā hai

purāne peḌ phir taaza phaloñ se ladne lagte the
ga.e mausam se dil jab bhī gurezāñ hone lagtā thā