Tags-Mausam

mausam ke sau ruup magar in āñkhoñ meñ
ḳhvāb vahī haiñ ḳhvāboñ kī ta.abīreñ bhī

mire valvaloñ ke mizāj bhī ba-lihāz-e-mausam-e-vaqt haiñ
kabhī sard aah meñ jal ga.e kabhī ashk ban ke pighal ga.e

ye Thahrā barsāt kā mausam
āñgan meñ kīchaḌ hai kyā kam

visāl kā ho ki us ke firāq kā mausam
vo lazzateñ thiiñ ki andar se TūTtā thā maiñ

guzar rahā hai tasavvur se jeTh kā mausam
aur is samay meñ mujhe yaad aa rahā hai tū

kyā jāniye kis baat pe dushman huā mausam
sarsabz kisī shāḳh ko hone nahīñ detā

aañkh bhar ke jab us ne dekhā to
zard mausam meñ dil khulā Daalā

sabā gul-e-rez jāñ-parvar fazā hai
ye mausam aur vīrāñ mai-kada hai

ghar meñ udāsiyoñ kā hai mela lagā huā
mausam ġhamoñ kā apne nikhartā huā sā hai

tire ġham kā ḳhumār utrā adhūrī kaifiyat meñ
ye kaifiyyat koī mausam purānā DhūñDhtī hai

ajab tarah kā hai mausam ki ḳhaak uḌtī hai
vo din bhī the ki khile the gulāb āñkhoñ meñ

husn-e-butāñ kī baat hī 'azmī' chhiḌī rahe
mausam kā kuchh na kuchh to mazā lenā chāhiye

maiñ is zarḳhez mausam meñ bhī ḳhālī haath lauTā to
vo khetoñ meñ qalam kar ke mirī bāheñ lagā degā

mausam-e-ishq aa gayā hai kyā
dastakoñ kā dhamāl lagtā hai

ab nahīñ hai us kī khiḌkī ke tanāzur meñ bhī chāñd
ek pur-asrār mausam se guzar merā bhī hai

rañg havā se chhūT rahā hai mausam-e-kaif-o-mastī hai
phir bhī yahāñ se hadd-e-nazar tak pyāsoñ kī ik bastī hai

mazāq uḌāyā hai mausam ne tishna-kāmī kā
baġhair paanī kai kaalī ghaTā.eñ bhejī haiñ

jitne mausam haiñ sabhī jaise kahīñ mil jaa.eñ
in dinoñ kaise batā.ūñ jo fazā hai mujh meñ

ye vo mausam hai jis meñ koī pattā bhī nahīñ hiltā
dil-e-tanhā uThātā hai sa.ūbat shām-e-hijrāñ kī

uḌte pattoñ pe lapaktī hai yuuñ Daalī Daalī
jaise jaate hue mausam kī nishānī māñge