Tags-Mausam

fazā meñ jab bhī bikharte haiñ rañg mausam ke
tumhāre aks se lagte haiñ rañg mausam ke

kiyā hai ham ne bhī mahsūs 'jyotī' har lamha
tumhāre dil meñ machalte haiñ rañg mausam ke

badal jā.egā mausam dard kī shāḳh-e-barahana meñ
nikaltī aa rahī haiñ pattiyāñ āhista āhista

ḳhushbuoñ se mirī har saañs ko bhar detā hai
mausam-e-gul tire aane kī ḳhabar detā hai

nok-e-mizhgāñ pe yaad kā aañsū
mausam-e-gul kī sard shabnam hai

ho din kī fazāoñ kā sargam yā bhīgtī rātoñ kā aalam
kitnā hī suhānā ho mausam dildār nahīñ to kuchh bhī nahīñ

kaun andesha-e-fardā kā malāl aaj kare
mausam-e-gul meñ nahīñ fikr-e-zamistāñ mujh ko

laḌne kī taab to miTTī ke makānoñ meñ hai
kāñch-ghar mausam-e-barsāt meñ mar jaate haiñ

bhīgī bhīgī palkoñ par ye jo ik sitāra hai
chāhatoñ ke mausam kā āḳhirī shumāra hai

ḳhushī aur dukh ke mausam sab ke apne apne hote haiñ
kisī ko apne hisse kā koī lamha nahīñ detā

kin zaḳhmoñ ke Tāñke TuuTe kin dāġhoñ ke band khule
ḳhuun hai rañgat shām-o-sahar kī aag hai mausam duniyā kā

vo phuul huuñ jo khilā ho ḳhizāñ ke mausam meñ
tamām umr mujhe hasrat-e-bahār rahī

duur tak chhā.e the bādal aur kahīñ saaya na thā
is tarah barsāt kā mausam kabhī aayā na thā

ga.e mausam kī khulī dhuup na yādoñ pe paḌe
barf pighlegī to chaḌh jā.eñge dariyā mujh meñ

sāzishoñ ke daur meñ mausam ne yuuñ jakḌā hameñ
ain mumkin hai mo.arriḳh bhī likhe andhā hameñ

ab to behtar hai yahī kuchh bhī na yaad aa.e 'na.īm'
mausam-e-gul meñ kise khoyā thā kyā paayā thā

ye barf-mausam jo shahr-e-jāñ meñ kuchh aur lamhe Thahar gayā to
lahū kā dil kī kisī galī meñ qayām mumkin nahīñ rahegā

rahe na zad meñ kisī bhī badalte mausam kī
nihāl-e-dil pe vahī phuul ik khilā diyā jaa.e

suukh ga.ī haiñ dhuup meñ shāḳheñ ummīdoñ armānoñ kī
mausam-e-ġham ne dil ke shajar kā pattā patā luuT liyā

kisī mausam kī faqīroñ ko zarūrat na rahī
aag bhī abr bhī tūfān bhī sāġhar se uThā