Tags-Mausam

na jā na jā kabhī us gulshan-e-tarab meñ na jā
junūñ kā naam jahāñ mausam-e-bahār nahīñ

mirī jānib se kah denā sabā lahore vāloñ se
ki is mausam meñ dehlī kī havā kuchh aur kahtī hai

ik barg-e-muzmahil ne ye spēch meñ kahā
mausam kī kuchh ḳhabar nahīñ ai Daliyo tumheñ

terā merā saath rahegā kāñTe log bichhā.eñge
lekin apnī rāhguzar par mausam phuul khilā.egā

ghaTā.eñ dekh kar be-tāb hai bechain hai 'shā.ir'
tire qurbān o mutrib sunā de koī mausam kī

kuchh to tire mausam hī mujhe raas kam aa.e
aur kuchh mirī miTTī meñ baġhāvat bhī bahut thī

itnā mil letā hai az-rāh-e-takalluf hī sahī
koī mausam mirā mausam nahīñ hone paatā

avval-e-ishq kī saa.at jā kar phir nahīñ aa.ī
phir koī mausam pahle mausam sā nahīñ dekhā

zindāñ zindāñ shor-e-junūñ hai mausam-e-gul ke aane se
mahfil mahfil ab ke baras arbāb-e-vafā kī baat chalī

paa.ī na 'shamīm' apne saaqī kī nazar yaksāñ
har aan badaltā hai mai-ḳhāne kā mausam bhī

koī mausam ḳhizāñ se āshnā us ko nahīñ kartā
ham apne ḳhuun se jo gulsitāñ tahrīr karte haiñ

ghulne lagī haiñ jaise rag-e-jāñ meñ ThanDakeñ
kyā dekhte hī dekhte mausam badal ga.e

yādeñ Tīseñ sī ban kar rah jaatī haiñ
guzrā mausam phir kab lauT ke aatā hai

mausam-e-gul ho koh-e-sahrā ho
sar ho saudā ho valvalā hamdam

rañg is mausam meñ bharnā chāhiye
sochtī huuñ pyaar karnā chāhiye

mahkoñ gulshan gulshan meñ
mausam pe chhā jaanā tum

talab ke mausam gañvā.e maiñ ne kamāl-e-ġham se dhuāñ dhuāñ tum
shikāyateñ ye kaḌe mahāzoñ se lauT aane ke baad hoñgī

vo kholeñge āvāra mausam ke jhoñke
jo khiḌkī sharāfat ne kholī na hogī

baḌī gāliyāñ degā phāgun kā mausam
agar aaj ThaTThā ThiTholī na hogī

is gulshan-e-hastī meñ ajab diid hai lekin
jab chashm khulī gul kī to mausam hai ḳhizāñ kā