Tags-Mausam

mausam badle phir bhī hai āshob-e-visāl-o-hijr vahī
haal zamāne kā jab ye ho kyā maazī kyā haal kareñ

kisī mausam to apne bādbānoñ par bhī 'ālī'
likheñge āshnā jhoñke havā kā raas honā

tum par ḳhushiyoñ ke saare hī mausam utreñ
ham ko saare dukh bahlāne aate haiñ

hijr kī rut sahn-e-jism-o-jāñ se ruḳhsat ho ga.ī
ḳhushnumā mausam hai ab ham raaz kī bāteñ kareñ

dayār-e-dil meñ hai phir dāġh-e-ishq kā toḌā
junūñ matā-e-havas mausam-e-bahār meñ luuT

maiñ to har lamha badalte hue mausam meñ rahūñ
koī tasvīr nahīñ jo tire albam meñ rahūñ

ye sab kuchh Thiik hai par is se jī ghabrā bhī jaatā hai
agar mausam na badle aadmī uktā bhī jaatā hai

jab iḳhtiyār chaman par nahīñ to ham ko kyā
hazār baar agar mausam-e-bahār aayā

ḳhizāñ kā daur gayā mausam-e-bahār aayā
magar na is dil-e-be-sabr ko qarār aayā

jo fasl-e-ḳhizāñ meñ kāñToñ par raqsān-o-ġhazal-ḳhvāñ guzre the
vo mausam-e-gul meñ bhuul ga.e phūloñ meñ bhī ḳhanjar hotā hai

jaane kyā baat huī mausam-e-gul meñ ab ke
pañkh panchhī ke fazāoñ meñ bikharte hī rahe

tarjumānī-e-ġham-e-zīst kā mausam bhī nahīñ
sho.ala-e-ġham bhī nahīñ mauj-e-tabassum bhī nahīñ

le gayā chaman ko bhī mausam-e-bahār aa kar
ab qafas kā gosha hai hāsil-e-bahār apnā

mirī udāsī kā zard mausam
agar kisī din

is mausam paanī aage aa.egā tum ghar meñ mat sonā
jab chhat kī khachchī jhuk jaa.e

rahtā hai mohabbat ko har vaqt hī dhaḌkā sā
mausam kī tarah kahte haiñ dost badalte haiñ

aaj na jaane kyuuñ lagtā hai dil kā mausam nikhrā nikhrā
fasl-e-junūñ kā mehmāñ ban kar kaun rukā hai mere andar

ḳhāmoshī se jhel rahī hai garmī sardī har mausam kī
majbūrī kī chādar oḌhe ek anā hai mere andar

sardī aur garmī ke uzr nahīñ chalte
mausam dekh ke sāhab ishq nahīñ hotā

ab to vo mausam purāne ho ga.e
ab to vo bāteñ haiñ saarī ḳhvāb kī