Tags-Mausam

inhī udāsiyoñ kī kā.enāt meñ kabhī to maiñ
ḳhizāñ ko jiit lūñgī mausam-e-bahār kī tarah

udaas kāġhzī mausam meñ rañg o bū rakh de
har ek phuul ke lab par mirā lahū rakh de

jo pūchhtā thā mirī umr us se kah denā
kisī ke pyaar ke mausam kā ek jhoñkā hai

mausam badalte rahe taqdīr kī tarah
maiñ shahr shahr phirā dhuup kī tarah

achchhā sā koī mausam tanhā sā koī aalam
har vaqt kā ronā to be-kār kā ronā hai

ġhaib se aa.egī havā chal kar
mausam-e-gul pukār kar dekheñ

yādoñ ke suhāne mausam meñ us garm-badan kī aañch liye
chal nikle haiñ ham yuuñ ḳhush ḳhush hai jaise vo idhar rahtā hī to hai

ġham kā mausam biit gayā so ronā kyā
kal ke ġham ko aaj ke din meñ bonā kyā

aa.e haiñ dene tasallī vo sambhal jaane ke ba.ad
zindagī kī dhuup kā mausam badal jaane ke ba.ad

mausam-e-vasl terī zulfoñ meñ
āstāna gulāb kā bhī thā

rañg-e-mausam hī mohabbat kā diyā jis ne bigāḌ
shahr bhar ke liye kyā ek hī bad-ḳhū kam hai

khule darīche ke bāhar hai kaun sā mausam
ki aag bharne lagī sard lahr āñkhoñ meñ

us ke karam se hai na tumhārī nazar se hai
mausam diloñ kā dard ke raushan shajar se hai

nikhrā nikhrā sā hai ummīd kā mausam yuuñ bhī
shāḳh-e-ummīd pe kuchh aur sañvar aur sañvar ya.anī tū

ab ḳhizāñ aa.e yā bahār aa.e
koī mausam to sāzgār aa.e

mausam kā e'tibār nahīñ bādbāñ na khol
kuchh der sāhiloñ kī havā aur dekh le

āḳhir-kār varaq ke chithḌe kar degī
har mausam bosīda rahne kī aadat

ajiib mausam-e-dil hai ajiib majbūrī
na ḳhud se rūThūñ na tum se bichhaḌnā chāhtī huuñ

junūñ tabdili-e-mausam kā taqrīroñ kī had tak hai
yahāñ jo kuchh nazar aatā hai tasvīroñ kī had tak hai

phir vahī mausam-e-judā.ī hai
phir mujhe apnī yaad aa.ī hai