Tags-Maut

dam-e-āḳhir mirī bālīñ pe majma.a hai hasīnoñ kā
farishta maut kā phir aa.e pardā ho nahīñ saktā

pābandi-e-rasm-e-bar-tarf kyuuñ ai maut
un ke bhī kiye haiñ tū ne qaidī āzād

maut kī ḳhushbū aa rahī hai 'munīr'
maiñ ki bīmār kī saañs ho gayā huuñ

intihā par ishq aa kar ho gayā hai ain husn
maut kī bhī aañkh paḌtī hai tire bīmār par

murdoñ se shart bāñdh ke soī hai apnī maut
haañ dekhnā zarā falak-e-pīr dekhnā

zindagī mahbūb hai phir bhī duā.eñ maut kī
māñgtā hai dil mirā din raat kyuuñ

jahāñ ne dekhā nahīñ aisā girya-o-mātam
jab apnī maut pe nauha-kunāñ huā hai ye dil

maiñ aap apnī maut kī tayyāriyoñ meñ huuñ
mere ḳhilāf aap kī sāzish fuzūl hai

kal tak bahut ġhurūr meñ phirtī thī zindagī
ab maut sāmne hai batā kyā karegī aaj

maiñ jahāñ jā.ūñ vahīñ maut kī tahvīl meñ huuñ
teġh ik laTkī hai har saañs pe nigrānī kī

ḳhvāb-e-lahad hai pur-sukūñ ahd-e-hayāt pur-alam
maut na kyuuñ ho tāna-zan zindagi-e-darāz par

mohmal hai na jāneñ to, samjheñ to vazāhat hai
hai ziist faqat dhokā aur maut haqīqat hai

ab maut hī le jaa.e to le jaa.e yahāñ se
kūche se tire ham se to jaayā nahīñ jaatā

tū ne mire ḳhamīr meñ kitne tazād rakh diye
maut mirī hayāt meñ naqs mire kamāl meñ

na hai sitāre kī gardish na bāzi-e-aflāk
ḳhudī kī maut hai terā zavāl-e-nemat-o-jāh

kū-ba-kū dar-ba-dar bhaTakte hue
dekh lī aaj maut kī bhī galī

sukūñ hai maut yahāñ zauq-e-justujū ke liye
ye tishnagī vo nahīñ jo bujhā.ī jaatī hai

sochiye gar use har nafas maut hai kuchh mudāvā bhī ho be-hisī ke liye
sūrajoñ kī virāsat milī thī hameñ dar-ba-dar ho ga.e raushnī ke liye

shādāb hai jis se kisht-e-hastī
vo biij bhī maut bo ga.ī hai

na jis kā koī sahārā ho vo kidhar jaa.e
na aa.e maut to be-maut kaise mar jaa.e