Tags-Maut

raqs ab ḳhatm huā maut kī vaadī meñ magar
kisī paa.el kī sadā ruuh meñ tābinda hai

hijr-e-jānāñ meñ jī se jaanā hai
bas yahī maut kā bahāna hai

zindagī bhī shab-e-hijrāñ hai ki kaTtī hī nahīñ
maut hai kyā tirā aanā ki bulā bhī na sakūñ

maut ke naam se Darte the ham ai shauq-e-hayāt
tū ne to maar hī Daalā thā qazā se pahle

ham ko jaldī ne maut kī maarā
aur jiite to aur ġham sahte

har ek dāman-e-gul par falak ke aañsū haiñ
ḳhizāñ kī maut se yuuñ zīnat-e-bahār na ho

us ne ḳhvāhish kī to us ko maut ke saa.e mile
maiñ ne ḳhvāhish kī to mujh ko jism kā maqtal milā

vo maut kā manzar jo thā din raat vahī hai
muñh se na kaho sūrat-e-hālāt vahī hai

bedār rah kar bhī hameñ ḳhvārī milī so tai kiyā
maut aa na jaa.e jab talak soyā kareñge raat din

iqtizā-e-asr-e-nau hai zindagī to darkinār
maut ko bhī husn ke sāñche meñ Dhalnā chāhiye

kyuuñ rahm vo zālim karne lagā kyuuñ maut yahāñ tak aane lagī
ulfat se mirī sūrat se mirī bezār huī bezār huā

allāh jaane maut kahāñ mar ga.ī 'ḳhumār'
ab mujh ko zindagī kī zarūrat nahīñ rahī

zindagī kyā maut se Dartā nahīñ mard-e-hazīñ
phir bhī is duniyā meñ koī pūchhne vaalā nahīñ

maut kī raah āsān ho jā.egī
pyaar se dekhiye zindagī kī taraf

maut tak dostī nibhāte haiñ
aadmī se bahut baḌe haiñ peḌ

zahr meñ Duubī huī ik muskurāhaT
maut kā paiġhām ho kar rah ga.ī hai

ham to muddat ke mar ga.e hote
maut ne zindagī baḌhā dī hai

sard thī maut kī mānind hayāt
aañch sī shola-e-jāñ se aa.ī

rah-e-vafā meñ mujhe kaash aisī maut mile
ki bād-e-marg mujhe merī zindagī tarse