Tags-Mehfil

ai jazba-e-ulfat tū hī batā kuchh had bhī hai is nākāmī kī
māyūs nigāhoñ se un kā mahfil meñ nazārā kaun kare

saaqī vo mai pilā ki hamesha rahe surūr
mahfil meñ mujh sā bāda-kash-e-mo'atabar bhī hai

maiñ harf ban ke tirī ruuh meñ utar jā.ūñ
mirā suḳhan tirī mahfil meñ bāryāb to ho

karūñgā maiñ tirī mahfil kī raunaqeñ do-chand
merī taraf bhī agar lutf kī nigāh karo

is soch meñ baiThe haiñ jhukā.e hue sar ham
uTThe tirī mahfil se to jā.eñge kidhar ham

yādoñ kī mahfil meñ kho kar
dil apnā tanhā tanhā hai

kyā aalam hai behosh meñ bhī vā ahl-e-nazar kī nazreñ haiñ
mahfil meñ kisī ke dāman se dāman ko bachānā paḌtā hai

ārzūoñ kī ujāḌī huī mahfil meñ kahīñ
sham-e-dil koī jalātā hai to ro lete haiñ

nikāle jā.eñge ahl-e-mohabbat
ab is mahfil meñ begāne raheñge

shu.ūr-e-qurb kī ye bhī hai ik ajab manzil
ham us ko ġhair kī mahfil meñ dekh kar na jale

kyā aa ga.ī niiñd ahl-e-mahfil
kahnī thī hameñ bhī ik kahānī

rañj-o-ḳhushī 'sartāj' baham haiñ ye duniyā kī mahfil hai
ġham kī tāneñ kahīñ pe jāgeñ shor kahīñ shahnā.ī kā

ham ḳhuub jānte haiñ ustādiyāñ tumhārī
mahfil meñ baiThe baiThe āñkheñ milā.iyegā

sab jazb-e-ārzū kī tamāzat kā khel hai
dil sard ho to garmī-e-mahfil bhī kuchh nahīñ

ye mahfil hai hans lo gā lo
tanhā.ī meñ khul kar ronā

aaj mahfil meñ na.e sar se sañvar ā.eñge
un ko ma.alūm hai kuchh ahl-e-nazar ā.eñge

mere anfās kī lau se nahīñ mahfil raushan
ik charāġh-e-tah-e-dāmāñ huuñ hamesha kī tarah

bhiiḌ ham jaisoñ kī rahtī hai hamesha yuuñ to
raushnī hotī hai mahfil meñ bas ik kaukab se

maiñ huuñ 'majāz' aaj bhī zamzama-e-sanj-o-naġhma-ḳhvāñ
shā.ir-e-mahfil-e-vafā mutrib-e-bazm-e-dil-barāñ