Tags-Mehfil

sar-e-mahfil vo mujh se be-sabab āñkheñ churāte haiñ
koī aise meñ tohmat un ke sar aa.ī to kyā hogā

udāsī chhā ga.ī chehre pe sham-e-mahfil ke
nasīm-e-sub.h se shole bhaḌak uThe dil ke

nigah gustāḳh tevar tund kaun aayā sar-e-mahfil
'niyāz' aate hī tere fikr sab ko ho ga.ī apnī

mujhe mahfil kī nazroñ se nazar aatā hai mahfil meñ
gavārā ḳhātir-e-rañgīñ ko hai sāda-dilī apnī

kise ma.alūm kyā mahfil pe guzrī
fasāna kahte kahte so ga.e ham

mujh par to jamī thiiñ tirī mahfil kī nigāheñ
maiñ vo thā ki mahfil meñ bhī tanhā nazar aayā

maiñ ne to kabhī aap ko tanhā nahīñ dekhā
maiñ aap ko mahfil meñ bhī tanhā nazar aayā

abhī to sochā thā terī mahfil meñ ham na ā.eñge ab dobāra
ye kis sadā kā gumāñ huā hai ki yak-ba-yak ham Thahar ga.e haiñ

'firāq' bazm-e-charāġhāñ hai mahfil-e-rindāñ
saje haiñ pighlī huī aag se chhalakte ayāġh

sab ko mahfil meñ nasīb un ke nazāre hoñge
ham kahīñ ġhash meñ paḌe ek kināre hoñge

ham na hoñge to terī mahfil meñ
kaun hogā ġhazal-sarā kuchh soch

mahfil meñ log chauñk paḌe mere naam par
tum muskurā diye mirī qīmat yahī to hai

sar-e-mahfil tamāshā apnā banvānā nahīñ achchhā
jahāñ izzat na miltī ho vahāñ jaanā nahīñ achchhā

kahāñ sochā thā maiñ ne bazm-ārā.ī se pahle
ye merī āḳhirī mahfil hai tanhā.ī se pahle

tum husn kī ḳhud ik duniyā ho shāyad ye tumheñ mālūm nahīñ
mahfil meñ tumhāre aane se har chiiz pe nuur aa jaatā hai

kahāñ gayā tirī mahfil meñ zom-e-dīda-varāñ
ye hausla to yahāñ kam-nazar bhī rakhte haiñ

aa nikaltā kabhī zāhid jo tirī mahfil meñ
haath meñ shīsha-e-mai taaq pe qur.āñ hotā

kahānī apnī apnī ahl-e-mahfil jab sunāte haiñ
mujhe bhī yaad ik bhūlā huā afsāna aatā hai

aaj hai kis liye aisā tirā andāz-e-hijāb
ajnabī kaun hai mahfil meñ pakaḌ kaan uThā

mahfil-e-nāz se maiñ ho ke pareshān uThā
baiThne bhī nahīñ paayā thā ki tūfān uThā