Tags-Mehfil

jab ham ne baat chheḌī mahfil huī charāġhāñ
har shai ne daad māñgī zaḳhmoñ kī anjuman se

na jaane kaun sī mahfil meñ kis ke saath huuñ maiñ
hai munqat'a mirā apnā bhī rābta mujh se

terī mahfil meñ ki maqtal meñ kahīñ dekhā thā
zindagī se mirī bas itnī shanāsā.ī hai

suunī suunī sī hai har mahfil-e-īzā-e-talabī
jaise duniyā meñ koī ġham na rahā mere ba.ad

ḳhāmoshiyoñ meñ mahfil-e-anjum kī us ko dekh
hañgāma-mast kyuuñ tū numūd-e-sahar meñ hai

ta.ajjub hai mujhī ko apnī mahfil meñ nahīñ dekhā
nahīñ dekhā agar tum ne to dekhā kyuuñ nahīñ karte

samajh meñ aa gayā terī nigāhoñ ke ulajhne par
bharī mahfil meñ sab kā ham ko hairāñ dekhte rahnā

garmi-e-mahfil vahī hai jam.a haiñ ahbāb bhī
hastī-e-parvāna o sham-e-shabistāñ ab bhī hai

koī 'sardār' kab thā is se pahle terī mahfil meñ
bahut ahl-e-suḳhan uTThe bahut ahl-e-kalām aa.e

mahfil-e-ishrat meñ mah-rūyoñ ke 'mehr'
aa.ina mahv-e-tamāshā ho gayā

jatā rahe haiñ hamīñ ko na dekhnā apnā
vo dekh dekh ke mahfil meñ har kisī kī taraf

sham-e-turbat par mirī aate hue jalte haiñ par
sham-e-mahfil par to aa jaate the parvāne bahut

jo us ke dil meñ aatā hai vahī kahtā hai mahfil meñ
kabhī likh kar nahīñ laatā kabhī paḌh kar nahīñ aatā

sham.a hai sar-e-mahfil kuchh kahā nahīñ jaatā
shola-e-zabāñ le kar baat ko tarastī hai

aaj apnī mahfil meñ hai balā kā sannāTā
dard hai na taskīñ hai hosh hai na mastī hai

baiTh ke yāroñ kī mahfil meñ piite rahnā der talak
apne-āp ko bhuul hī jaanā ham ko achchhā lagtā thā

na jaao dekh lo sham-e-sahar kā jhilmilānā bhī
ye mahfil kī bahār-e-āḳhirī ma.alūm hotī hai

zarā ai mai-kasho anjām-e-mahfil par nazar rakhnā
ki daur-e-āḳhirī meñ niiñd sī ma.alūm hotī hai

mire marne se tum ko fikr ai dildār kaisī hai
tumhārī dil-lagī ko mahfil-e-aġhyār kaisī hai

vo soz-o-gudāz us mahfil meñ baaqī na rahā andher huā
parvānoñ ne jalnā chhoḌ diyā sham.oñ ne pighalnā chhoḌ diyā