Tags-Mehman

ye aalam hai ki ab kuchh bhī nahīñ ik hū kā aalam hai
hamāre ḳhāna-e-dil meñ koī mehmān thā pahle

piite haiñ faqat saath nibhāne ke liye ham
har shaam ko ġham hotā hai mehmān hamārā

aa.egā to ik do pal mehmān rahegā āñkhoñ meñ
jā.egā to ik qissa tūlānī de kar jā.egā

halqa-e-fikr-o-suḳhan ne mujhe izzat baḳhshī
ya.anī mehmān ḳhusūsī kī fazīlat baḳhshī

aaj kī raat kaTegī kyuuñ kar saaz na jaam na to mehmān
sub.h talak kyā jāniye kyā ho aañkh lage yā jaa.e jaan

un ke aate hī huā hasrat-o-armāñ kā hujūm
aaj mehmān pe mehmān chale aate haiñ

dil meñ phir vasl ke armān chale aate haiñ
mere rūThe hue mehmān chale aate haiñ

dil se agar kabhī tirā armān jā.egā
ghar ko lagā ke aag ye mehmān jā.egā

barsīñ āḳhir bārish jaise kyoñ āñkheñ
tum bādal mehmān banā.e baiThe ho

bahut se zaḳhm jin ko mustaqil mehmān rakkhā hai
badan kī qaid meñ kuchh dard kā sāmān rakkhā hai

mehmān ho yā ki yaañ tū aa kar
yā rakh mujhe apne haañ bulā kar

sameT le ga.e sab rahmateñ kahāñ mehmān
makān kāTtā phirtā hai mezbānoñ ko

rahā na piirī meñ jab kuchh bhī zindagī kā maza
sahar ke vaqt chale uTh ke mehmān-e-hayāt

Thahar jā koī dam ke mehmān haiñ
ḳhabar le hamārī chale ham chale

vo jab se aa ga.e mehmān ban ke ā.ankhoñ meñ
ham apne dil ke khañDar ko makāñ samajhne lage

laakh koshish karo aa ke jaatī nahīñ
yaad ik bin bulā.ī sī mehmān hai

kaun sā ġham hai mire dil meñ jo mehmān nahīñ
mujh pe kam ye bhī mire yāroñ kā ehsān nahīñ

huā mehmān aa kar raat bhar vo sham.a-rū barsoñ
rahā raushan mire ghar kā charāġh-e-ārzū barsoñ

ā.īne meñ dekh ke chehra be-shak maiñ hairān huā
dil kī duniyā luuT gayā hai jo dil kā mehmān huā

faaqe kā din aaj hai 'amabar'
allāh ke mehmān bane haiñ