Tags-Mehndi

kis hinā-hāth se āñgan hai mo.attar itnā
vaqt-e-ḳhush sā.at-e-bedār kahāñ se aa.ī

dil ko kyuuñ pā.emāl karte ho
na to sabza hī na hinā hai ye

rañg-e-ḳhūñ roz-e-azal se hai nishān-e-inqilāb
ziist kā unvāñ magar rañg-e-hinā kaise huā

dekhā jo baḌī der talak us ne muñh apnā
le dast-e-hinā-basta meñ ā.īna halab kā

kise dekhūñ kaho lagūñ kis ke gale shab-e-vasl meñ mujh se jo tū ye kahe
ki ye bāda-e-surḳh tū pī le tujhe mire hāthoñ ke rañg-e-hinā kī qasam

mauj-e-rañg aa.ī kuchh is taur ki dil jhuum uThā
hosh gum kar diye sarmast hinā ne mere

saañs lenā hai fanā ho jaanā
raaz ye barg-e-hinā jāntī hai

dīvār-o-dar pe ḳhuun ke chhīñTe haiñ jā-ba-jā
bikhrā huā hai rañg-e-hinā tere shahar meñ

aaj phir dasht koī ābla-pā māñge hai
ḳhaar bhī tāzgī-e-rañg-e-hinā māñge hai

ye kahnā ab bhī sulagtā hai jism kā chandan
tumhārā qurb thā ik shola-e-hinā kahnā

kahā thā kis ne ki lākhoñ ke dil karo pāmāl
jo kah rahe ho ki laale paḌe hinā ke mujhe

hinā ye kahtī hai un se sunā sunā ke mujhe
nahīñ shahīdoñ meñ milnā lahū lagā ke mujhe

hinā ye kahtī hai lo be-zabān pā ke mujhe
jab aa.e aap ga.e choriyāñ lagā ke mujhe

ye haath bāñdh ke kahtā hai dil ke zaḳhm kā chor
huzūr yaad haiñ sab hathkañDe hinā ke mujhe

ThiThurte phuul pe tasvīr-e-rañg-o-bū kab tak
jhulastī shāḳh pe barg-e-hinā hai kitnī der

kisī ke rabt-o-ta.ashshuq pe itnā naaz na kar
hinā kā rañg hai do roz meñ havā hogā

sajda badal rakhe sar sar-tā-qadam araq ho
tujh bā-hayā ke pag par aa kar hinā hayā suuñ

lahū ko pālte phirte haiñ ham hinā kī tarah
badal ga.e haiñ mazāmīñ tirī vafā kī tarah

qadam par us ke rakhtā huuñ sadā sar
'valī' ham-mashrab-e-rañg-e-hinā huuñ

urūs-e-fikr kī saada hatheliyoñ ke naam
tamām rañg-e-shafaq surḳhī-e-hinā likh do