Tags-Ahbaab

ye na milnā bhī ik aur ehsān hai bevafā.ī nahīñ
haal dekhā na jaatā thā ahbāb se 'ashk' kā dosto

bātoñ se sivā hotī hai kuchh vahshat-e-dil aur
ahbāb pareshāñ haiñ mire tarz-e-amal se

bad-gumāñ ahbāb hote haiñ to hone dījiye
baat kyuuñ ho fikr-o-fan kī rañg-o-roġhan dekh kar

pahle to na thī itnī tab-o-tāb ġhazal meñ
kaam aa ga.ī ġham-ḳhvārī-e-ahbāb ġhazal meñ

ḳhastagī meñ tujh se kyā shikva ki ai jān-e-murād
is bulandī se nazar aate nahīñ ahbāb bhī

huuñ ghar meñ ki ahbāb meñ mātūb rahe ham
kuchh ham se na aayā to dikhāvā nahīñ aayā

taras khāte haiñ kyuuñ ahbāb mere haal par 'aḳhtar'
bahut be-chainiyāñ baḌhtī haiñ ġham-ḳhvārī ke mausam meñ

maslahat-koshi-e-ahbāb se dam ghuTtā hai
kisī jānib se koī na.ara-e-yāhū aa.e

din guzartā hai mirā ahbāb meñ
raat ko fōtpath par sotā huuñ maiñ

ahbāb ko hālāt kī sāzish kā gilā thā
har haal meñ rāzī-ba-razā the to hamīñ the

mai piyo aap jo deveñ mujhe talchhaT ahbāb
un se kahte ho use ḳhaak na do aur suno

hālat-e-hāl meñ ādāb nahīñ bhūltā maiñ
ḳhud ko bhūlūñ bhī to ahbāb nahīñ bhūltā maiñ

aaj mujh ko bhī mire ahbāb dhoka de ga.e
maiñ tavānā shaḳhs thā a.asāb dhoka de ga.e

mujhe zabān zarūrat thī ik sadā ke liye
koī na thā mire ahbāb meñ vafā ke liye

ahbāb ye tum kahte ho bajā vo bazm-e-adū meñ baiThe haiñ
vo aa.eñ na aa.eñ un kī ḳhushī charchā to karo mar jaane kā

āñkhoñ meñ nuur hai na halāvat zabān meñ
ahbāb itne saare haiñ mīThā koī to ho

dil na chhoTā kījiye nā-qadrī-e-ahbāb par
aib-jūyoñ ko hunar pahchānñā mushkil huā