Tags-Migration

ḳhushbueñ jaane kyuuñ hijrat kar rahī haiñ
phuul jaane kis chubhan se mar rahe haiñ

har taraf tū nazar aatā hai jidhar jaatā huuñ
tere imkān se hijrat nahīñ kar saktā maiñ

ghar aur ghar ke ḳhvāb se hijrat ke ba.ad bhī
kyuuñ bām-o-dar ke dhoke meñ rakkhā gayā mujhe

shikam kī aag liye phir rahī hai shahr-ba-shahr
sag-e-zamāna haiñ ham kyā hamārī hijrat kyā

dard kī dhūp-bhare dil kī tamāzat le kar
kaise jaa.e koī ehsās kī hijrat le kar

phir aaj kuufe se hijrat bahut zarūrī hai
palaT ke ā.eñge āb-o-havā badalne tak

bād-e-hijrat tū hameñ le ke jahāñ aa.ī hai
in galī-kūchoñ meñ insānoñ ke shahkār mile

dard-e-dil kā kise karūñ iz.hār
ġham-e-hijrat ba-jān-e-man bisyār

mirī āñkhoñ se hijrat kā vo manzar kyuuñ nahīñ jaatā
bichhaḌ kar bhī bichhaḌ jaane kā ye Dar kyuuñ nahīñ jaatā

parinde chīḳh rahe haiñ ye kis kī hijrat par
ye kis ke vāste yārab terā jahān hai tañg

is se pahle ki zamīñ-zād sharārat kar jaa.eñ
ham sitāroñ ne ye sochā hai ki hijrat kar jaa.eñ

mirī pahchān merā gyaan hijrat
sadā ausān meñ be-ghar rahā huuñ

mire liye mirī hijrat hī ajr kyā kam hai
maiñ chal rahā huuñ ki har raah mere ghar kī hai

huī thī dostī jis se vo kar gayā hijrat
hamārā naf.a meñ yuuñ dekh le ḳhasārā koī

hijrat-o-hijr se bachā.e ḳhudā
mujh ko lāhaq haiñ aaj ġham donoñ

baḌā azaab hai mahmūda-'ġhāziya' hijrat
mire ḳhudā mujhe apnī panāh meñ rakhnā

kyā sitam hai ki bahāroñ ke hasīñ mausam meñ
ham parindoñ ne tire shahr se hijrat kī hai

hijr aur hijrat ko oḌh kar bhī dekhā hai
saañs tak na chaltī thī sardiyoñ kī shāmoñ meñ

itne mānūs haiñ ham terī galī se jānāñ
ham tire shahr se hijrat bhī nahīñ kar sakte

jo sail-e-hijrat-e-gul thā mire qadam se rukā
kamand lamha-e-sad-ishtibāh mujh se huā