Tags-Mohabbat

ye ek aah mohabbat kī tarjumān nahīñ
bahut tavīl the qisse jo muḳhtasar pahuñche

baazī hamesha dil hī mohabbat meñ le gayā
ik ma.arka bhī tum se koī sar nahīñ huā

jaan de dījiye ādāb-e-mohabbat ke liye
dekhiye ḳhāmī-e-jazbāt na hone paa.e

tiflī kī mohabbat ko javānī meñ na bhūlo
insāf karo kyā se hue kyā mire aage

sīnā-chākān-e-mohabbat ko ḳhabar hai ki nahīñ
shahr-e-ḳhūbāñ ke dar-o-bām sadā dete haiñ

kam-baḳht DhūñDhtī hai mohabbat meñ falsafa
tañg aa ga.e haiñ aql ke dīvāna-pan se ham

vo shauq bharī nazreñ uTh kar ik hashr bapā kar detī haiñ
duniyā-e-mohabbat kī har shai tab zer-o-zabar ho jaatī hai

hamīñ se bhuul kahīñ ho ga.ī mohabbat meñ
vagarna vo nigah-e-iltifāt apnī thī

apnī sarhad kī hifāzat pe hai īmān magar
zindagī aur mohabbat pe jo had hai rad hai

har ik dil yahāñ hai mohabbat se aarī
tumhīñ ko mubārak ye duniyā tumhārī

abhī tak na badlī mohabbat kī qismat
abhī tak mohabbat meñ hai be-qarārī

āġhāz-e-mohabbat se anjām-e-mohabbat tak
''ik aag kā dariyā hai aur Duub ke jaanā hai''

jis kī zulfoñ meñ lagāyā hai mohabbat kā gulāb
kāġhzī phūloñ se kartā hai pazīrā.ī mirī

husn se nibh na na sakī vaz-e-karam āḳhir tak
avval avval to mohabbat kī mudārāt huī

nā-fahm kahūñ maiñ use aisā bhī nahīñ hai
kyā shai hai mohabbat vo samajhtā bhī nahīñ hai

āsāñ nahīñ is rāh-e-mohabbat se guzarnā
jis raah meñ halkā sā ujālā bhī nahīñ hai

ziyān-e-dil hī is bāzār meñ sūd-e-mohabbat hai
yahāñ hai fā.eda ḳhud ko agar nuqsān meñ rakh leñ

yuuñ bhī sajtī hai badan par ye mohabbat kyā kyā
kabhī pahnūñ isī malbūs ko ulTā kar ke

bhalā 'naḳhshab' tire is be-niyāzāna ravayye ko
kamāl-e-qurb jaane yā mohabbat kī kamī samjhe

ye tajraba huā hai mohabbat kī raah meñ
kho kar milā jo ham ko vo pā kar nahīñ milā