Tags-Mohabbat

gudāz-e-mohabbat hameñ dil banā de
bas ek aañch aur aabla ho ga.e ham

mohabbat hai aziyyat hai hujūm-e-yās-o-hasrat hai
javānī aur itnī dukh bharī kaisī qayāmat hai

vo maazī jo hai ik majmua ashkoñ aur aahoñ kā
na jaane mujh ko is maazī se kyuuñ itnī mohabbat hai

āsāñ nahīñ dariyā-e-mohabbat se guzarnā
yaañ nuuh kī kashtī ko bhī tūfān kā Dar hai

nahīñ mujh se jab ta.alluq to ḳhafā ḳhafā se kyuuñ haiñ
nahīñ jab mirī mohabbat to ye kaisī bad-gumānī

parde parde meñ mohabbat dushman-e-jānī huī
ye ḳhudā kī maar kyā ai shauq-e-pinhānī huī

kahā thā us ne mohabbat kī aabrū rakhnā
chubhe hoñ kitne bhī kāñTe guloñ kī ḳhū rakhnā

fanā hai fanā muqtazā-e-mohabbat
taqāzā-e-ulfat ko ham dekhte haiñ

jab dil pe mohabbat kā tūfān guzar jaa.e
shabnam se sharar Tapke sho.aloñ se asar jaa.e

ye ḳhūn-e-mohabbat hai ḳhanjar na Thahar jaa.e
ik mahshar-e-betābī rag rag meñ utar jaa.e

ye rāh-e-mohabbat hai jo is se guzar jaa.e
parvāh nahīñ us ko zar jaa.e ki sar jaa.e

kyā turfa-tamāshā hai faizān-e-mohabbat se
jannat se bashar nikle jannat meñ bashar jaa.e

ye mohabbat bhī ajab taqsīm ke mausam meñ hai
saarā jazba is taraf hai sirf lahja is taraf

iqrār-e-mohabbat kī nāzuk sī dalīleñ haiñ
āñkhoñ meñ chamak aanā zulfoñ kā sañvar jaanā

maidān-e-imtihān meñ ai be-ġharaz mohabbat
dil kī zamīn tū ne Takrā dī āsmāñ se

kahīñ rusvā na hoñ rañgīniyāñ dard-e-mohabbat kī
mirā itnā ḳhayāl ai dīda-e-ḳhūñ-bār kar lenā

ye mohabbat mujhe tāqat degī hausla degī ye himmat degī
raushnī terī nazar se le kar har añdhere se guzar jā.ūñgā

sāñsoñ ko de ke tohfa-e-nik.hat guzar ga.ī
chhū kar mujhe havā-e-mohabbat guzar ga.ī

ik mohabbat ke sivā aur na kuchh māñgā thā
kyā kareñ ye bhī zamāne ko gavārā na huā

hamārā zikr kyā ham ko to hosh aayā mohabbat meñ
magar ham qais kā dīvāna ho jaanā samajhte haiñ