Tags-Mohabbat

tujh ko ab koī shikāyat to nahīñ
ye magar tark-e-mohabbat to nahīñ

tilism-e-gumbad-e-gardūñ ko toḌ sakte haiñ
zujāj kī ye imārat hai sañg-e-ḳhāra nahīñ

bichhaḌne kā irāda hai to mujh se mashvara kar lo
mohabbat meñ koī bhī faisla zaatī nahīñ hotā

maiñ jo ḳhud chal ke tirī zaat talak aaya huuñ
varna yuuñ hai ke mohabbat nahīñ miltī pagle

havas hai ishq kī ahl-e-havā ko ham to miyāñ
sune se naam mohabbat kā zard hote haiñ

ham musībat ke maare mohabbat nahīñ kar sakte
mohabbat agar mahbūb kī bāñhoñ meñ bāñheñ Daale samundar ke kināre chalne kā naam hai

sivā.e makr-o-kaid o hirs o fitrat
mohabbat kā yahāñ system nahīñ hai

mohabbat meñ tasanño ho to samjho
vo lauñDī hai koī begam nahīñ hai

lillāh ḳhabar liije ab qalb-e-shikasta kī
girtā hai mohabbat kā dālān are tauba

taqdīr-e-mohabbat thī mar mar ke jiye jaanā
jiinā hī muqaddar thā ham mar ke bhī kyā karte

mujh meñ thoḌī sī jagah bhī nahīñ nafrat ke liye
maiñ to har vaqt mohabbat se bharā rahtā huuñ

vo ta.alluq bhī mustaqil nahīñ thā
ye mohabbat bhī dā.imī nahīñ hai

be-laus mohabbat kī nazar DhūñD rahā huuñ
anjām to zāhir hai magar DhūñD rahā huuñ

hausle dil ke mohabbat meñ jo piste hī rahe
kar ke himmat tire ġhamzoñ ke muqābil to hue

rashk-e-dushman kī talāfī ko ye pahlū nahīñ kam
ġham-e-jāñ-kāh-e-mohabbat ke vo qātil to hue

ġham-e-mohabbat hai us kā jis ko nahīñ vo ġham ain hai vo rāhat
ḳharāb jo ishq meñ hai us ke nahīñ vo bigḌā banā huā hai

na pārsā.ī namāz se hai na roza-dārī hai zohd-o-taqvā
mai-e-mohabbat piye jo us kī vahī haqīqat meñ pārsā hai

kahāñ tak ho sakā kār-e-mohabbat kyā batā.eñ
tumhāre sāmne hai kaam jitnā ho rahā hai

tujhe bhī ishq huā hai ye kis zamāne meñ
nahīñ hai māl-e-mohabbat bhī dil-ḳhazāne meñ

milo ki baat baḌhe dekhte haiñ phir shāyad
zarā kahīñ se mohabbat juḌe fasāne meñ