Tags-Mohabbat

yā dil-o-dīda ko tanvīr-e-mohabbat baḳhsho
yā dam-e-sub.h zamāne meñ ujālā na karo

sozāñ hai az bas dāġh-e-mohabbat
ik ik kā sā sho.ala huā dil

vo mere dil kī kahte haiñ maiñ un ke dil kī kahtā huuñ
mohabbat ittifāq-e-bāhamī ma.alūm hotī hai

de kar ġham-e-dil ab vo bīmār-e-mohabbat ko
samjhāte haiñ un ke is samjhāne ko kyā kahiye

ye soz-e-mohabbat hai jab sham.a huī raushan
jal jaatā hai chupke se parvāne ko kyā kahiye

ye merā josh-e-mohabbat faqat ibārat hai
tumhārī champa.ī rānoñ ko noch khāne se

hai mohabbat meñ ujālā hī ujālā lekin
ye guphā duur se tārīk nazar aatī hai

muḌ muḌ ke dekhte haiñ mujhe rahguzar pe log
maiñ dekhtā huuñ zo.am-e-mohabbat kidhar gayā

qabroñ meñ nahīñ ham ko kitāboñ meñ utāro
ham log mohabbat kī kahānī meñ mareñ haiñ

maiñ ujāle ko mohabbat kā ḳhudā likhtā huuñ
vo añdhere hī se mānūs huā jaatā hai

mujhe ḳhushī hai ki aaj merā junūñ bhī yuuñ mere kaam aayā
samajh ke dīvāna-e-mohabbat tumhāre hoñToñ pe naam aayā

ham un se jafāoñ kā jī bhar ke gila karte
lekin ye mohabbat kī tahqīr nazar aa.ī

phir apnī tamannāoñ kā dhāgā TuuTā
hāthoñ se mohabbat kā vo dāman chhūTā

tū ḳhudāvand-e-mohabbat hai maiñ pahchān gayā
dil sā ziddī tirī nazroñ kā kahā maan gayā

apne dil se bhī chhupāne kī thī koshish kyā kyā
vo mirā hāl-e-mohabbat jise tū jaan gayā

taskīn-e-visāl o rañj-e-furqat kyā hai
kyā hai ye kashākash-e-mohabbat kyā hai

dard-mandī bhī mohabbat bhī ravādārī bhī
kaam kitnā dil-e-nākām se vābasta hai

jafā jab tak ki chauñkātī nahīñ hai
mohabbat hosh meñ aatī nahīñ hai

na pūchho bahr-e-mohabbat meñ kuchh hamārā haal
jo kuchh hai āfat-e-dariyā so apnī naav pe hai

shart itnī thī mohabbat meñ badan tak pahuñcho
ham junūñ-pesha magar yaar kī jaañ tak pahuñche