Tags-Mohabbat

kyuuñ us ko mohabbat kā ehsās nahīñ hotā
āñkhoñ meñ mirī ab to har dard numāyāñ hai

salīqa nahīñ jab nibhāne kā ham ko
mohabbat tujhe kyuuñ pashemān karte

ḳhabar kis ko thī yuuñ aalam meñ rusvā.ī mirī hogī
ki unvān-e-mohabbat ko bhī thā afsāna na ban jaanā

nau-giraftār-e-mohabbat huuñ mirī vaz.a se tum
itnā ghabrāo na pyāre maiñ sambhal jā.ūñgā

gilā bhī tujh se bahut hai magar mohabbat bhī
vo baat apnī jagah hai ye baat apnī jagah

ġhair se sun ke mirā haal ta.assuf se kahā
jo ye sach hai to burī chiiz mohabbat hai zarūr

mire ashk-e-ḳhūnīñ kī gul-kāriyoñ se zamāne ko rañgīñ qabā.eñ milī haiñ
junūn-e-mohabbat kā ye faiz samjhūñ bayābāñ meñ bhī haiñ chaman ke nazāre

mohabbat kā patā detī haiñ āñkheñ
zabāñ se vo kahāñ khultā bahut hai

ba-zāhir to bahut nāzuk haiñ dil ahl-e-mohabbat ke
yahī shīshe kabhī patthar se bhī Takrā.e jaate haiñ

vo duzdīda nigāheñ hoñ ki ḳhanjar-āzmā abrū
mohabbat kī har ik manzil pe rahzan paa.e jaate haiñ

roz-e-avval se huuñ maiñ sabz-e-mohabbat kā asiir
sāya-afgan hai daraḳhtoñ kī duā mere saath

kis tarah kareñ us kī mohabbat pe bharosā
ai dost qayāmat kī adākār hai duniyā

ḳhāna-e-dil meñ karūñ dāġh-e-mohabbat ko talab
raushnī ke liye is ghar ke jo mehmāñ māñgūñ

ab is se baḌh ke tire saath kyā mohabbat ho
maiñ tujh ko yaad karūñ aur sāmnā ho jaa.e

jise dil-ḳharāshī nahīñ ishq kī
tarīq-e-mohabbat meñ be-kār hai

mirī taḌap ko samajhtā thā ik ibādat vo
mujhe bhī us kī mohabbat duā sī lagtī thī

phir kyā thā jo parde meñ thā rusvā to nahīñ thā
thā rāz-e-mohabbat magar ifshā to nahīñ thā

na kah kisī se ki 'ġhālib' nahīñ zamāne meñ
harīf-e-rāz-e-mohabbat magar dar-o-dīvār

vo nahīñ merā magar us se mohabbat hai to hai
ye agar rasmoñ rivājoñ se baġhāvat hai to hai

ai mauj-e-havādis tujhe mālūm nahīñ kyā
ham ahl-e-mohabbat haiñ fanā ho nahīñ sakte