Tags-Mohabbat

ḳhvāb dekhā thā mohabbat kā mohabbat kī qasam
phir isī ḳhvāb kī tābīr meñ masrūf thā maiñ

us ke shar se maiñ sadā māñgtā rahtā huuñ panāh
isī duniyā se mohabbat bhī balā kī hai mujhe

shāyad mujhe kisī se mohabbat nahīñ huī
lekin yaqīn sab ko dilātā rahā huuñ maiñ

jis ke mashrab meñ mohabbat ho mohabbat kā javāb
merī taqdīr meñ aisā koī insāñ na huā

yahī aadat to hai 'sādī' sukūn-e-qalb kā baa.is
maiñ nafrat bhuul jaatā huuñ mohabbat baañT detā huuñ

merī jānib na baḌhnā ab mohabbat
maiñ ab pahle se mushkil rāstā huuñ

mohabbat se jo ḳhālī ho vo dil be-kār hotā hai
ḳhalā meñ jā.iye bait-ul-ḳhalā meñ kuchh nahīñ rakkhā

tum mohabbat meñ kahāñ sūd-o-ziyāñ le aa.e
ishq kā naam ḳhirad hai na junūñ hai yuuñ hai

nāsehā tujh ko ḳhabar kyā ki mohabbat kyā hai
roz aa jaatā hai samjhātā hai yuuñ hai yuuñ hai

mohabbat ke bāzār meñ aur kyā hai
koī dil dikhā.e agar dekh lenā

ġham-e-hayāt sharīk-e-ġham-e-mohabbat hai
milā diye haiñ kuchh aañsū mirī sharāb ke saath

mohabbat karne vāloñ ne jo chhoḌe haiñ zamāne meñ
nishāñ un ke miTānā ab mujhe achchhā nahīñ lagtā

dil dete hī un ko ghulne lage nazroñ meñ ajal ke tulne lage
āġhāz-e-mohabbat se ye khulā chāhat kā ba-ḳhair anjām nahīñ

jab tak ye mohabbat meñ badnām nahīñ hotā
is dil ke ta.iiñ hargiz ārām nahīñ hotā

baal apne baḌhāte haiñ kis vāste dīvāne
kyā shahr-e-mohabbat meñ hajjām nahīñ hotā

khul jaa.e bharam zabt-e-mohabbat kā na un par
Dartā huuñ kahīñ aañkh meñ aañsū na bhar aa.e

mohabbat kī har ik manzil pe sahrā-e-adam niklā
ḳhizar bhī saath de sakte nahīñ har gaam par merā

laa.e haiñ phuul ahl-e-mohabbat kī qabr par
kyā yaad aa gayā unheñ tark-e-jafā ke ba.ad

tah kar chuke bisāt-e-ġham-o-fikr-e-rozgār
tab ḳhānqāh-e-ishq-o-mohabbat meñ aa.e haiñ

tum hī nahīñ ilāj-e-mohabbat se be-niyāz
ham ne bhī ehtiyāt ke purze uḌaa.e haiñ