Tags-Mother

maañ baap ne 'ādarsh' ko ye fan bhī sikhāyā
kartā nahīñ huuñ aaj bhī maiñ ghaat jān-e-man

mirī mohabbat meñ saarī duniyā ko ik khilaunā banā diyā hai
ye zindagī ban ga.ī hai maañ aur mujh ko bachcha banā diyā hai

supurd-e-ḳhāk to kar aa.e maañ ko tum 'at.har'
ġhamoñ kī dhuup meñ saaya kahāñ se pāoge

maañ kahtī hai ghuTtī jaltī rahnā pī lenā aañsū
sheroñ meñ bhī beTī apnā ġham tahrīr nahīñ karnā

bachchoñ ne iid par jab na.are bahut lagā.e
maañ baap ne bhī apne dukhḌe unheñ sunā.e

apnī har taḳhlīq hai mujh ko is duniyā meñ sab se aziiz
har ik maañ ko apnā beTā chāñd kā TukḌā lagtā hai

ḳhuun ban ke rag rag meñ duudh maañ kā bahtā hai
qarz ye bhī vājib hai kaise ham chukā.eñge

aulād pe agar jo musībat na hotī aaj
kyuuñ maañ kā haath ruktā nivāloñ ke darmiyāñ

itnī bechain thī us raat mahak phūloñ kī
jaise maañ jis ko ho kho.e hue bachche kī talāsh

maañ baiTh ke taktī thī jahāñ se mirā rasta
miTTī ke haTāte hī ḳhazāne nikal aa.e

apne adhūre vajūd ke saath
maiñ ne apnī aadhī qabr maañ kī kokh meñ banā.ī

raat hamārī maañ jaisī hai
niiñd hamārī aañkh meñ rakh kar

kaho kyā mehrbāñ nā-mehrbāñ taqdīr hotī hai
kahā maañ kī duāoñ meñ baḌī tāsīr hotī hai

tūfāñ se bach nikalne kī sūrat na thī koī
ye faiz merī maañ ke hī dast-e-duā kā thā

kahāñ kāñTe bichhe hoñge kidhar se ā.eñge patthar
mirī maañ ḳhvāb meñ aa kar mujhe sab bol detī hai

maiñ maañ huuñ satā.ī huī had darja bahū kī
aur beTe pe aa.e hue ġhusse kī tarah huuñ

in dīvāroñ pe hī huī tahrīr
mere maañ baap kī javānī bhī

jab diloñ meñ rahe na gunjā.ish
maañ na samjhe makān meñ kuchh hai

farz aulād kā hotā hai 'dinesh'
apne maañ baap kī ḳhidmat karnā

charāġh le ke bhī DhūñDheñge to milegī nahīñ
jahāñ meñ ek bhī hastī jo maañ sā pyaar kare