Tags-Mulaqat

jaan lene kā vaisā salīqa abhī lashkar-e-dushmanāñ meñ kisī ko nahīñ
aao ab apne ḳhemoñ meñ vāpas chaleñ dostoñ se mulāqāt karte raheñ

jāntī thī kī bichhaḌnā hai hameñ āḳhir jab
chand lamhoñ kī mulāqāt pe ġham kyā karnā

vaqt-e-āḳhir na mulāqāt mirī us se huī
har ġhazal meñ mirī ye nauha sunā.ī degā

kal ham se mulāqāt meñ vo yaar jo kī bahs
maiñ bhī vahīñ ik baat meñ bezār ho kī bahs

yuuñ guzartā hai mulāqāt kā har ik lamha
jaise lamhāt kā dariyā ye ravāñ hotā hai

na jī bhar ke dekhā na kuchh baat kī
baḌī aarzū thī mulāqāt kī

ishq se baaz aa.e ham us se chalo kah ke aa.eñ
ab to mulāqāt kā ek bahāna bhī hai

dil ke aTakte hī huā hai sitam
farq mulāqāt meñ din raat kā

hukm huā raat ko aao na yaañ
din ko rakho taur mulāqāt kā

dil kī ho dil se mulāqāt bahut mushkil hai
aur sab sahl hai ye baat bahut mushkil hai

un ko kyā hove hai juz rizq-e-pareshāñ hāsil
jā-ba-jā bote phireñ haiñ jo mulāqāt ke biij

mire ḳhayāl ke saa.e tire badan ke aks
pukārte haiñ mulāqāt kī hadoñ meñ aa

itnī achchhī thī mulāqāt ki pahle din hī
dil meñ 'afroz' basāyā use sochoñ kī tarah

yaad kā phuul mahakte hī navāh-e-shab meñ
koī ḳhushbū se mulāqāt ko chal paḌtā hai

raas yaktā.ī bahut aa.ī huī hai ham ko
qaid ho kar bhī mulāqāt nahīñ chāhte ham

ho mulāqāt to safā.ī se
aur safā.ī nahīñ to phir kyā hai

tai huī thī ek mulāqāt railway-Track par
lekin rail-gāḌī kā engine musalsal khāñstā rahā

na mulāqāt na ashfāq na va.ada na payām
kyūñki taskīn tire hijr meñ hove mujh ko

dostoñ shukr karo mujh se mulāqāt huī
ye na pūchho ki luTī hai mirī duniyā kaise

chand lamhoñ ke liye ek mulāqāt rahī
phir na vo tū na vo maiñ aur na vo raat rahī