Tags-Muskurahat

tumhārī āñkhoñ kī muskurāhaT meñ
merī chāhat kī raushnī hai

de ke koī muskurāhaT kā kafan
aarzū ko dil meñ hī dafnā gayā

zahr meñ Duubī huī ik muskurāhaT
maut kā paiġhām ho kar rah ga.ī hai

mo.ajiza maiñ ne ye dekhā tire lab par aksar
muskurāhaT meñ nihāñ barq-e-tajallā-e-bahār

kalī par muskurāhaT aaj bhī ma.alūm hotī hai
magar bīmār hoñToñ par hañsī ma.alūm hotī hai

vo khoyā khoyā sā un kā aalam laboñ pe halkī sī muskurāhaT
adā ye un kī 'matīn' jaise sunā bhī hai aur sunā nahīñ hai

muskurāhaT nahīñ aatī lab-e-sāqī pe 'shamīm'
ġham-e-daurāñ ke liye sub.h-e-najāt aatī hai

kisī kī āñkhoñ meñ tāroñ kī muskurāhaT hai
kisī kī āñkhoñ ko shabnam kā kārobār milā

muskurāhaT ho yā aa.heñ yā ḳhushī ke aañsū
har ik ehsās kī lazzat meñ samāyā hai tū

muskurāhaT le ke aayā thā vo sab ke vāste
itnī ḳhushiyāñ aa ga.iiñ ghar-bār chhoTā paḌ gayā

aañsū merī hañsī uḌāte hai
muskurāhaT pe ro liyā huuñ maiñ

namī sī aañkh meñ aur hoñT bhī bhīge hue se haiñ
ye bhīgā-pan hī dekho muskurāhaT hotī jaatī hai

hameñ tum muskurāhaT do
tumheñ ham khilkhilāte roz o shab deñge

chhupā chhupā sā phirā dard muskurāhaT meñ
jo saath the unheñ pahchān meñ nahīñ aayā

ek paikar sā dhueñ ke biich lahrāne lagā
nīm-vā hoñToñ pe raqsāñ muskurāhaT sī huī

vo jis ko dekhe to dukh kā lashkar bhī laḌkhaḌā.e shikast khaa.e
laboñ pe apne vo muskurāhaT sajā ke rakhnā kamāl ye hai

ye muskurāhaT kā ek pardā sā gar haTā kar
'kabīr' dekho to sab ke andar haiñ ek jaise

muskurāhaT meñ koī tanz bhī ho saktā hai
ye masarrat kī alam-dār ho aisā bhī nahīñ

aañkh pur-nam magar muskurāhaT mirī
kah rahī thī kahānī mire ishq kī

muskurāhaT kī bhī āḳhir asliyat khul hī ga.ī
ġham zamāne se chhupāne kā maza jaatā rahā